Iung pơma pơgơ̆r blŭng a apĭnh hơlen, Kơdră chĕp pơgơ̆r Kuô̆k hô̆i Vương Đình Huệ pơma hơdăh: ‘moi kiơ̆ pơgơ̆r au, Kuô̆k hô̆i gô băt hơdăh tơdrong păng dôm tơdrong jang kiơ̆ rim tơdrong tơchơ̆t đơ̆ng Kuô̆k hô̆i, tơdrong jang kiơ̆ rim “nơ̆r pơkăp” đơ̆ng Khul kơdră chĕp pơgơ̆r Teh đak, rim Kơdră chĕp pơgơ̆r Hơnih bơ̆ jang.

Tơdrong dăr lăng hơlen dơ̆ng, lăng kơjăp dăr lăng dôm tơdrong hlôi đei dăr lăng, apĭnh hơlen vă tơgŭm ăn Khul kơdră chĕp pơgơ̆r teh đak, rim Kơdră chĕp pơgơ̆r Hơnih bơ̆ jang đei rơvơn tơroi tơbăt ăn Kuô̆k hô̆i, bơngai tăh hla păng kon pơlei găh dôm tơdrong bơ̆ hlôi jang, hơtŏk hơnăp jang, xek tơlang ‘lơ̆ng dôm tơdrong mă Kuô̆k hô̆i tơlĕch ăn. Kơdră chĕp pơgơ̆r Kuô̆k hô̆i athei rim kơdră tang măt Kuô̆k hô̆i atŏk kơtang jơhngơ̆m đon ‘lơ̆ng, hơnăp jang,. Pơm hơdăh trŭh tơ̆p truh troch tơdrong jang kiơ̆ tơdrong tơchơ̆t găh dôm tơdrong hlôi dăr lăng, apinh hơlen.