Pơtoi kơ ‘măng hop akŏm mă 7, ‘năr brei (25/5), Kuôk hô̆i ‘măn minh năr vă pơma đam tơ̆ hnam akŏm gah Tơroi đơ̆ng Khul jang Hơlen păng chih akŏm Tơchơ̆t kơ Kuôk hô̆i gah tơdrong hơlen “tơdrong pơm kiơ̆ Tơchơ̆t kơsô̆ 43 sơnăm 2022 đơ̆ng Kuôk hô̆i gah pơkăp jên hu su kăk, jên tơgŭm ăn Tơdrong jang hơmet hơtŏk mŭk drăm – tơpôl păng dôm tơchơ̆t đơ̆ng Kuôk hô̆i gah minh ƀar tơdrong jang kăp gĭt kơ teh đak truh đĭ sơnăm 2023.

Kiơ̆ đơ̆ng chă hơlen tơdrong pơm kiơ̆ Tơchơ̆t 43 đơ̆ng Kuôk hô̆i ăn ƀôh, tơdrong tơbang Tơchơ̆t âu noh trŏ ƀlep hloh, tơtom lơ̆m khei năr mŭk drăm – tơpôl teh đak oei tơjră hăm lơ tơnap tap kơyuơ răm kơtang đơ̆ng pơrang jĭ Covid-19. Gơnơm đơ̆ng noh mŭk drăm đei ƀôh hơtŏk kơtang lơ̆m sơnăm 2022, hăm tơdrong hơtŏk GDP đei hloh 8%, jing tơdrong hơtŏk kơjung hloh lơ̆m jăl sơnăm 2011 - 2022. Khul jang Hơlen kơ Kuôk hô̆i adoi sơkơ̆t: Dôm trong pơkăp jang gah jên hu, jên mong lơ̆m Tơchơ̆t 43 hlôi tom tơgŭm gah jên hu ăn dôm anih jang ƀơm răm hlăm đơ̆ng pơrang jĭ Covid-19 lơ̆m khei năr tơnap tap hloh.