Rim bơngai tang măt akhan, Jơnŭm pơgơ̆r teh đak, Thủ tướng teh đak hlôi tơrĕk pơgơ̆r, đei lơ trong jang drơ̆ng minh, tơnăp vă pơm kiơ̆ kĭ pơkăp jên mong kơ teh đak. Lơ̆m noh, jên mong kơ teh đak ăn sơnăm 2022 yak hloh 28%, iŏk đơ̆ng jên dôm anih jang mŭk drăm teh đak, jên asong jang kơtă đơ̆ng teh đak đe, anih jang mŭk drăm ‘nguaih kơ teh đak vei lăng păng hơmet hơtŏ jên mong teh đak tơchơ̆t ăn tơdrong hơtŏk mŭk drăm – tơpôl sơnăm 2022, vei sơđơ̆ng jên jang ăn dôm tơdrong jang mŭk drăm tih, tơjur jên hre păng jên yua hloh pơkăp.

Sơkơ̆t pơtôch tơdrong pơma đam, Phŏ Kơdră Kuôk hô̆i Nguyễn Đức Hải pơkăl Jơnŭm pơgơ̆r teh đak hơmet tơdrong chih akŏm, kla jên hơdar; atŭm hăm noh hơmet pơ-‘lơ̆ng dôm tơdrong oei tơjruh lơ̆m vei lăng, iŏk yua jên mong kơ teh đak nhen: iŏk tơmơ̆t, huach păng chih ưh đei trŏ hơdah, ưh đei sơkơ̆t, asong jên ah hơtuch sơnăm oei tŏk lơ, oei kơƀah thuê̆, jên âu to athei nôp. Asong jên jang păng hre ming man oei lơ tơ̆ tơring.