Hơnơ̆ng tơdrong jang ‘Măng hop akŏm mă 6, năr ‘nâu (30/10) Kuôk hô̆i yak mơ̆t lơ̆m giĕng bơ̆jang mă 2. Lơ̆m năr ‘nâu, dôm bơngai tang măt Kuôk hô̆i pơma dơnuh tơ̆ hơnih hop akŏm tơm găh tơdrong tơlĕch jang kiơ̆ dôm Tơdrong tơchơ̆t đơ̆ng Kuôk hô̆i găh dôm Tơdrong jang tơm teh đak găh pơjing tơring tơrang ‘nao jăl jang 2021 - 2025, tơjur dơnuh hin kơjăp jăl jang 2021 - 2025, hơtŏk tơiung mŭk drăm - tơpôl tơring kon pơlei kon kông păng tơring groi kông jăl jang 2021 – 2030. Truh hơtuch khei 8 sơnăm ‘nâu, akŏp jên tơmơ̆t jang teh đak tơlĕch jên jang đơ̆ng 3 tơdrong jang tơm teh đak ‘noh jĭ 16 rơbâu 300 ti hlak jên, ‘nao đei vă jê̆ 48% trong tơlĕch jang.

Jên hơmet ăn tam mă tơgăl pơtêng hăm tơdrong hơgăt, athei tơlĕch ăn; klaih song jên tơmơ̆t jên jang hơtŏk tơiung jên jang trung ương hiơ̆ (jăl khei mă II.2022 ‘nao pơjao); kơsô̆ jên iŏk jang kơ tơring tam mă lăp. Tơ jur dơnuh hin tam mă iŏk đei tơdrong hơgăt lơ pang, kơjăp, mă loi ‘noh jĭ tơ̆ tơring kon pơlei kon kông, tơring groi kông. Phŏ Thủ tướng Trần Lưu Quang tơbăt: Khŭl kơdră teh đak tơlĕch hăm Kuôk hô̆i tơplih jên đơ̆ng sơnăm 2023 jing sơnăm 2024 păng athei rim tơring ưh khan lăp tơlĕch đĭ jên mă tơdrong ‘lơ̆ng tơdrong jang athei vei sơđơ̆ng.