Tơ̆ kơsơ̆, Kuôk hô̆i yơ̆r ti pơdrơ̆ng kiơ̆ Luơ̆t vei lăng tơdrong jang khŭl lĭnh păng hơnih khŭl lĭnh, đơ̆ng rŏng kơ ‘noh gô pơma dơnuh tơ̆ hơnih hop akŏm tơm găh Luơ̆t vei sơđơ̆ng trong sơnăm. Kơsơ̆ 23/11, pơma dơnuh tơ̆ hơnih hop akŏm tơm găh 1,2 tơdrong oei tơgop nơ̆r pha ra băl đơ̆ng luơ̆t Dôm anih asong tŏk iŏk jên (hơmet ming), lơ bơngai tang măt Kuôk hô̆i khan ‘nâu jĭ Luơ̆t tôch kơ hơnat, mơmat tat, đei tơdrong ưh kơ hơiă, ƀơm truh sơđơ̆ng jên hu teh đak, sơđơ̆ng  kơ khŭl jang dôm anih asong tŏk iŏk jên, ƀơm ưh kơ ‘lơ̆ng jrŭ să truh tơdrong jang mŭk drăm -tơpôl.

Luơ̆t ‘măng âu tam mă tơlĕch đei dôm tơdrong hơgăt vă hơmet pơ ‘lơ̆ng đơ̆ng tơm tơdrong asong tŏk iŏk jên tơ̆ ‘ngoăih hăm jên cheh lơ; dôm trong jang hơdăh gô ưh kơ kĕ tơ jră đei dôm tơdrong pơm glăi ưh kơ ƀôh rơđăh đơ̆ng tơdrong iŏk yua hơdrom băl, tơroi ưh kơƀlep lơ̆m tơdrong jang anih mong jên.