Lơ bơngai tang măt drơ̆ng 1 nơ̆r hăm hla ar chih tơroi tơbăt đơ̆ng Khŭl kơdră teh đak găh iŏk yua sơnăm 2023 păng tơchĕng hơdrol trong tơlĕch jang hơtŏk tơiung mŭk drăm, tơpôl dôm sơnăm truh; pơma hơdăh lơ̆m tơdrong mơmat tat atŭm đơ̆ng mŭk drăm jơ̆p plei teh, mă lei Khŭl kơdră teh đak hlôi đei dôm nơ̆r athei tôch kơtang păng jơnei iŏk yua tôch kơ ‘lơ̆ng. Lăng ‘lơ̆ng jơnei iŏk đei, lơ bơngai tang măt akhan vă iŏk đei tơdrong hơgăt jang tŏk vă jê̆ truh, Khŭl kơdră teh đak, dôm anih tơm anih jang kăl kơhơnơ̆ng jang ‘lơ̆ng lơ̆m tơlĕch jên jang teh đak, tơplih ‘lơ̆ng hơnih tĕch mơdro păng tơgŭm tơpă ăn anih jang mơdro sa tơiung ming đơ̆ng rŏng COVID-19.

Lơ bơngai tang măt kŭm athei kăl kơ bơngơ̆t hloh truh dôm tơdrong tơpôl, tang găn pơm glăi, mă loi ‘noh jĭ pơm glăi ‘nao. Tơ̆ jơ pơma dơnuh, 1,2 ‘nu bơngai tang măt athei pơm rơđăh tơring hơyơ apĭnh 350.000 ti hlak jên vă hơmet ‘lơ̆ng joh ayŏ; hơdai hăm athei pơm rơđăh tơdrong tơm păng trong jang, tơdrong hơgăt đơ̆ng tơdrong jang âu, đơ̆ng noh mă băt hơdăh jên jang mă lăp.