Tơ̆ pơgê, Kuôk hô̆i pơma dơnuh tơ̆ hơnih hop akŏm tơm găh 1,2 tơdrong oei tơgop nơ̆r pơma ra băl đơ̆ng Luơ̆t khŭl lĭnh vang jang vei lăng sơđơ̆ng tơ̆ tơring. Tơ̆ kơ sơ̆, Kuôk hô̆i pơma dơnuh tơ̆ grŭp găh tơdrong: Hơmet ming 1,2 tơdrong đơ̆ng tơdrong tơchơ̆t 53 đơ̆ng kuôk hô̆i găh Hla ar tơroi tơbăt tơchĕng hơlen tơdrong jang iŏk pơdreo teh; hrŭ ‘mong, tơgŭm, ăn oei tơ̆ plei hle đơ̆ng Cham gre păr apŭng plĕnh teh Long Thành; Tơdrong tơchơ̆t pơlong lăng 1,2 trong jang tơgŭm hơdrô̆ găh tơmơ̆t jên jang ming man trong nơnăm.

Luơ̆t khŭl lĭnh vang jang vei lăng sơđơ̆ng tơ̆ tơring hlôi đei pơtruh ăn Kuôk hô̆i ăn tơgop nơ̆r tơ̆ ‘măng hop akŏm mă 5 hăm lơ kơ sô̆ dôm nơ̆r tơgop drơ̆ng lăp găh tơdrong kăl tơlĕch ăn Luơ̆t. Luơ̆t hlôi đei anih jang pơgơ̆r chih hơmet ming păng chih pơkeh hăm dôm tơdrong tơm lăp hăm ‘meh vă yan âu.