Đơ̆ng rŏng giĕng iung jang ah năr 15/11 truh dang ei, khul Kanh sat dăr hơlen trong nơnăm Kŏng an dêh char Lâm Đồng hlôi jang atŭm hăm dôm anih juăt jang tơlĕch dăr hơlen jê̆ 40.000 tong gre vih vơ̆t, lơ̆m noh đei jê̆ 11.000 gre tih, hloh 5.600 gre chơ bơngai păng jê̆ 14.000 gre hơyuh...

Kiơ̆ đơ̆ng noh, ƀôh băt păng chih hla bar sơkơ̆t glăi hăm hloh 1.500 ‘nu, lơ̆m noh lơ bơngai pơm glăi gah ƀuih sik, kơdâu renh, ƀôh 50 ‘nu vơ̆r gre gronh et ma túy. Kiơ̆ thượng tá Cù Tuấn Nghĩa, Phŏ Kơdră Anih Kanh sat dăr hơlen trong nơnăm – Kŏng an dêh char Lâm Đồng, noh atŭm hăm tơlĕch hơlen păng sek tơlang kơjăp dôm bơngai pơm yoch, tơdrong chă hơvơn tơroi, pơtho đe vih vơ̆t kiơ̆ trong, pơm kiơ̆ tơnăp Luơ̆t trong nơnăm adoi đei tơlĕch jang hăt hot.