Jơnŭm pơgơ̆r tơring tŏk bŏk oei akŏm tơlĕch lơ trong jang vă tang găn păng tơjră teh hơlih; kơchăng ‘nhăk kon pơlei jăk oei tơ̆ anih nai vă tang găn tơdrong răm. Lơ̆m dôm năr âu ki, kon pơlei xah Đạ K’Nàng, apŭng Đam Rông (dêh char Lâm Đồng) ưh đei sơđơ̆ng jơhngơ̆m đon kơlih hli kơ teh hơlih. Pơtoi lơ̆m 2 ‘măng teh hơlih pơm 3 ‘nu bơngai lôch lơ̆m năr 15/7 păng năr 20/7, mă hlôi đei jơnei pơgơ̆r tơring hơmet răm, ƀŭ jrăng chih tơbang chư tơbăt anih hli hlơt, mă lei tơdrong teh hơlih adoi oei pơngơ̆t.

Atŭm hăm apŭng Đam Rông, lơ tơring kơ dêh char Lâm Đồng hlôi đei lơ anih tơbang đei teh hơlih lơ̆m pơyan ‘mi âu. Lơ̆m noh, pơlei tơm Đà Lạt đei 61 anih păng pơlei tơm Bảo Lộc đei 55 anih hli hlơt. Hơdrol kơ pơyan ‘mi kial đunh năr, Anih jang vei lăng kon pơlei dêh char Lâm Đồng pơtoi đei hla bar tơchơ̆t pơtruh ăn rim anih jang păng Anih jang vei lăng kon pơlei rim apŭng, pơlei tơm akŏm tơlĕch lơ trong jang vă hơmet, tang găn păng tơjră hăm teh hơlih.