Khei ‘năr âu ki, rim ‘măng tơlĕch tơdrong gơih jên mong vang tơgŭm ăn bơngai tơnuh ‘nŏh yă Nguyễn Thị Xuân An, phường 3, plt Đà Lạt, dêh char Lâm Đồng hơnơ̆ng vang gơih ăn. Hăm yă, kơsô̆ jên kơdih kâu ưh đei lơ mă lei tôch gĭt kăl, kŭm hăm đĭ đăng tơpôl vang tơgŭm ăn bơngai tơnuh, bơngai pơmat tat, tơgŭm ăn đe sư đei jên vă tŏk iŏk jang xa, tưk tơiung mŭk drăm lơm unh hnam.

Yă Nguyễn Thị Xuân An, pơma: “Kơdih kâu inh rim sơnăm vang gơih tơgŭm ngăl. Pơtih gia sơnăm sơ̆ gơih tŏ sĕt, sơnăm ‘nâu adrin gơih lơ ƀiơ̆, hơnơ̆ng thoi noh. Sơnăm ‘nâu inh gơih mong đei 20 triu, ‘năr 14/3 âu kơnh inh vă jur tơ̆ phường gơih dơ̆ng”.

‘Nâu jĭ sơnăm mă 4 Anih mong jên tơgŭm tơpôl dêh char Lâm Đồng jang hơdoi hăm Anih MTTQ Việt Nam păng dôm khul grŭp lơ̆m dêh char pơgơ̆r gơih jên mong vang tơgŭm ăn bơngai tơnuh. Kiơ kơ ‘nŏh, kơsô̆ bơngai vang jang kiơ̆, vang gơih jên mong roi đunh roi lơ, jên mong akŏm đei kŭm roi lơ ‘năi. Đơ̆ng 24 ti ƀât ‘măng mă blŭng tơtĕch tơdrong ‘nâu, truh ‘măng mă 3 kơsô̆ jên âu đĭ tŏk truh 130 ti hlak jên gơih mong vang tơgŭm yoa bơngai tơnuh.

Kiơ̆ ƀok Nguyễn Hữu Quang, Phŏ Kơdră Anih mong jên tơgŭm tơpôl dêh char Lâm Đồng, tơdrong gơih jên mong yoa bơngai tơnuh hlôi đei lơ kon pơlei vang jang kiơ̆. Lơ̆m ‘măng mă 4 âu, tơdrong gơih jên mong vang tơgŭm ăn bơngai tơnuh vă pơgơ̆r dang 1 khei, hơmĕng gô đei lơ bơngai vang gơih jên, jang kiơ̆: “Sơnăm ‘nâu, gơih jên mong ‘mơ ‘met yoa bơngai tơnuh pơgơ̆r truh 1 khei. Nhôn hơmĕng pơdui khei ‘năr đunh ƀiơ̆ vă kon pơlei vang gơih tơgŭm lơ ƀiơ̆. Nhôn ‘ngoăih kơ pơgơ̆r tơ̆ anih jang ‘nŏh dôm năr bơ̆ jang tơ̆ anih pơvih tơ̆ xăh, phường, thĭ trơ̆n kŭm hơnơ̆ng krao hơvơn kon pơlei, anih tĕch mơdro tơ̆ tơring vang gơih mong jên tơgop ăn tơdrong jang ‘nâu ‘năi”.

Truh dang ei, đơ̆ng rŏng hlŏh 1 giĕng tơlĕch, tơdrong gơih mong jên ‘mơ ‘met vang tơgŭm ăn bơngai tơnuh tơ̆ Lâm Đồng sơng đei hlŏh 1.400 'nu đảng viên, kăn ƀô̆, bơngai jang ăn teh đak, đoàn viên, bơnga iang păng kon pơlei vang gơih, hăm vă jê̆ 1.600 hlak hla ar 'mơ 'met jên, hăm kơsô̆ jên gơih hlŏh 67 ti.

Ƀok Võ Ngọc Hiệp – Kơdră jang lơ̆m Khul kơdră chĕp kơ̆l đảng dêh char, Phŏ Kơdră vei lăng kon pơlei dêh char Lâm Đồng, Kơdră tang măt ăn Khul pơgơ̆r vei lăng Anih mong jên tơgŭm tơpôl dêh char Lâm Đồng, akhan: “Tơdrong pơgơ̆r “Khei gơih mong jên ‘mơ ‘met yoa bơngai tơnuh” tôch gĭt kăl vă mong akŏm jên, pơm lăp roi đunh roi ‘lơ̆ng ăn tơdrong ‘mĕh vă tŏk iŏk jên đơ̆ng bơngai tơnuh păng dôm bơngai kăl đei tơgŭm nai, tơgop bơ̆ jang đei tơdrong pơhnŏng tơjur tơnuh hin kơjăp ‘lơ̆ng đơ̆ng dêh char. Hơdai hăm ‘nŏh, pơm tơplih ‘lơ̆ng đon hlôh vao păng bơ̆ jang đơ̆ng rim anih jang, khul grŭp păng đĭ đăng tơpôl lơ̆m tơdrong mong akŏm jên tơgŭm ăn kon tơpôl; krao hơvơn dôm anih tĕch mơdro, anih jang, khul grŭp, bơngai jang ăn teh đak păng kon pơlei lơ̆m dêh char Lâm Đồng tơƀôh jơhngâm đon ‘lơ̆ng, tưk tơiung tơdrong ‘mêm mơnat hăm bơngai tơnuh păng dôm bơngai ưh pŭn ai kiơ̆ đơ̆ng gơih mong jên 'mơ 'met tơ̆ Anih mong jên tơgŭm ăn tơpôl hăm đon tơchĕng “Tơdrong jang iĕ đei yoa tih” vă mong akŏm kon jên “Vang tơgŭm ăn bơngai tơnuh păng dôm bơngai kăl đei tơgŭm nai”.

Tơjur tơnuh hin kơjăp ‘noh jĭ trong jang tih đơ̆ng Đảng, Teh đak păng hơnăp jang đơ̆ng đĭ đăng kon pơlei, tôch ‘lơ̆ng hơiă, jĭ trong vă jang hơnơ̆ng, ưh đei tơplih đơ̆ng Đảng, Teh đak lơ̆m tơdrong pơjing anih jang mŭk drăm hiôk hian kiơ̆ trong xã hội chủ nghĩa. Jên asong tŏk iŏk yoa Anih mong jên tơgŭm ăn tơpôl pơgơ̆r jĭ 1 lơ̆m dôm trong jang ‘lơ̆ng vă tơgŭm pơm tơjur tơnuh hin yoa đơ̆ng Đảng, Teh đak pơgơ̆r păng tơ̆ dêh char Lâm Đồng tơdrong tơgŭm asong tŏk iŏk jên hlôi ƀôh đei yoa tôch ‘lơ̆ng, vang tơgop ăn tơdrong jang tơjur tơnuh hin kơjăp ‘lơ̆ng, pơjing tơring tơrang ‘nao, vei lăng ‘lơ̆ng tơdrong arih xa tơpôl tơ̆ tơring.

Jang kiơ̆ tơdrong jang “Jơ̆p tơring lơ̆m teh đak yoa bơngai tơnuh – Ưh đei hŭt hơchăng bu tơ̆ rŏng” yoa Thủ tướng teh đak tơlĕch, lơ̆m 3 sơnăm âu ki “Gơih jên mong ‘mơ ‘met vang tơgŭm ăn bơngai tơnuh” đei Anih mong jên tơgŭm ăn tơpôl dêh char Lâm Đồng jang hơdoi hăm 4 Khul grŭp tơpôl iŏk bơ̆ jang vang pơgơ̆r đang ‘lơ̆ng hăm lơ bơngai jang, đoàn viên păng kon pơlei lơ̆m dêh char vang tơgop, mong akŏm đei lơ kon jên tơmât lơ̆m Anih mong jên tơgŭm tơpôl vă asong ăn bơngai tơnuh păng dôm bơngai kăl đei tơgŭm nai tŏk iŏk jên vă jang xa.