Hop akŏm ‘măn lơ jơ pơma ơdnuh, tơgop lơ nơ̆r găh tơdrong proh hơmet, trong vă jang tơplih rơgoh, choh jang sa kơmăy kơmŏk ‘nao kơ dêh char Lâm Đồng; mơ̆ng dôm bơngai vei lăng, dôm bơngai joăt jang tơroi găh dôm tơdrong đei ƀơm truh jên jang, trong jang pơtrŭt tơdrong tơplih kŭm nhen tơdrong hiôk đơ̆ng dôm bơngai tơmơ̆t jên jang hăm dôm tơdrong jang tơplih rơgoh đơ̆ng tơring.

Hơdai hăm ‘noh, dôm bơngai tang măt kŭm pơma dơnuh găh jên jang ăn hơtŏk rơgoh, hơtŏk tơiung kơjăp; hơtŏk tơiung bri pơtăm păng trong jang hơmet ‘lơ̆ng tơdrong jang sa ăn tơpôl dôm hơdrĕch kon kông tơ̆ tơring. GS. TS Trần Hồng Thái, Kơdră Anih vei lăng kon pơlei dêh char Lâm Đồng pơma hơdăh, hop akŏm jĭ tơdrong hiôk tih vă dêh char roi tơƀôh tơmam, tơdrong đei yua mưh truh tơmơ̆t jên jang, tĕch mơdro tơ̆ dêh char Lâm Đồng. Dêh char gô chih iŏk tôm nơ̆r tơgop, pơtho tơƀôh đơ̆ng dôm bơngai joăt jang, bơngai tơmơ̆t jên jang, anih mơdro sa, kiơ̆ đơ̆ng noh đei trong jang pơtrŭt hơtŏk tơiung mŭk drăm tơpôl, tơplih rơgoh kơjăp đơ̆ng dêh char Lâm Đồng tơ̆ hơnăp kơnh.