Hla bơar pơtruh hăt hot đơ̆ng Hơnih bơ̆ jang vei lăng kon pơlei dêh char Lâm Đồng athei Kŏng ang dêh char pơrô̆ athei khul bơ̆ jang năm dăr lăng, xơkơ̆t hơdăh tơdrong tơm pơm ăn, pơm hơdăh hơnăp chiu pŭ kơ rim hơnih jang đei ƀơm truh tơdrong sar bar păng xek tơlang kơhret rim tơdrong pơm glăi tơdăh đei kiơ̆ ƀlep tơdrong tơchơ̆t kơ khôi luơ̆t. Adoi iung jang hơdoi hăm Hơnih bơ̆ jang ăn Hơnih chĕp pơgơ̆r kon pơlei dêh char vă xek tơlang rim tơdrong đei ƀơm truh, xek tơlang tơdrong sar kiơ̆ tơdrong tơchơ̆t.

Lăp đơ̆ng rŏng đei tơdrong sar bar, Thủ tướng Teh đak hlôi chih pơtruh hla bơar tơchơ̆t hăt hot tơbăt jơhngơ̆m đon apĭnh jet gia, vang ơ̆h sơ-‘ngon atŭm hăm ŭnh hnam rim bơngai lôch răm; adoi athei Hơnih tơm jang tơbôl, Kơdră chĕp pơgơ̆r Hơnih vei lăng kon pơlei dêh char Lâm Đồng păng rim hơnih bơ̆ jang ƀơm truh hơnơ̆ng pơrô̆ jang, tơlĕch jang hơmet pơ ‘lơ̆ng tơdrong sar bar.