Vă jê̆ 250 ‘nu bơngai tang măt, dơ̆ng tang ăn hlŏh 65.000 ‘nu đoàn viên công đoàn tơ̆ dêh char Lâm Đồng vang truh hop akŏm. Mă đơ̆ng tơjră hăm lơ tơdrong pơmat tat đơ̆ng jĭ Covid-19, mă lei rim khul công đoàn tơ̆ dêh char Lâm Đồng oei adrin bơ̆ jang đei lơ tơdrong jang ‘lơ̆ng, jang kĕh păng tŏk hlŏh tơdrong hơgăt mă Hop akŏm ‘măng mă IX Công đoàn dêh char tơlĕch. Lơ̆m nŏh, hơiă hlŏh jĭ jang ‘lơ̆ng hơnăp jang dơ̆ng tang, vei lăng tơdrong đei yoa trŏ luơ̆t, tôch tơgăl đơ̆ng công nhân, bơngai jang.

Mă hơdăh, đĭ đei vă jê̆ 79.000 ‘nu đoàn viên, bơngai jang đei khul năm ngôi, jet gia pơma nuh, hơpăh ăn tơmam kiơ̆ đơ̆ng tơdrong jang “Têt Hơdai”; 46.500 ‘nu bơngai đei răt tơmam, iŏk yoa tơdrong pơvih đơ̆ng 85 anih tĕch mơdro hăm kơjă reh; tơgŭm man, hơmet ming 118 tŏ hnam ăn đoàn viên, bơngai jang đei tơdrong arih xa pơmat tat... Hop akŏm hlôi pơih rơih đei Khul kơdră chĕp kơ̆l Liên đoàn Lao động dêh char Lâm Đồng jăl X, đơ̆ng 2023 – 2028 đei 32 ‘nu.