Tơ̆ hop akŏm mă 10, Jơnŭm pơgơ̆r kon pơlei Lâm Đồng jăl X akhan, tơdrong pơm, ƀơk hla ar man hnam kơdih tơ̆ Đà Lạt oei tam mă kơjăp; Tơdrong vei lăng tĕh đak găh vei sơđơ̆ng mưh ming man tơ̆ tơring oei tam mă ‘lơ̆ng. Lơ bơngai pơm glăi găh tơdrong ming man mă lei tam mă đei anih jang kơpal dăr hơlen, sek tơlang tơtom. Đei bơngai đĭ sek phak bơih mă lei oei hơnơ̆ng pơm glăi, pơm tơtŏ đon tơpôl. Lơ̆m nŏh, tơdrong taluy hơlih ƀât anih oei ming man pơm ăn 2 ‘nu bơngai lôch păng 5 ‘nu bơngai nai rơka tơ̆ phường 10, plt Đà Lạt ƀât hơtuch khei 6 âu ki ‘nŏh jĭ 1 pơtih gia hơdăh hlŏh. 

Ƀok Trần Văn Hiệp, Kơdră vei lăng kon pơlei dêh char Lâm Đồng akhan, tơdrong tơproh trong jang, vei sơđơ̆ng mưh ming man pơjing tơring kơdrâm kăl đei bơ̆ jang mă ‘lơ̆ng. Khul kơdră pơgơ̆r păng anih jang kơpal athei pơma nuh păng tơlĕch đei tơdrong hơgăt mă rơđăh ăn rim tơring, mă loi jĭ tơ̆ dôm tơring tĕh krang dơ̆ng, taluy kơjung.

Ƀok Trần Văn Hiệp, pơma: “Lăng hăm măt hmă đĕch đĭ ƀôh tơdrong krê hơmơt dêh bơih mă lei Đà Lạt oei ƀơk ăn hla ar jang. Yak jur tơ̆ trong Mimosa, Khe Sanh đei 3-4 tŏ hnam tih tơter kông, jê̆ jơ̆ng kông athei hơlen năng dơ̆ng, yoa tôch kơ krê. Tơdăh kăl athei iŏk pơdreu dơ̆ng tĕh, jô̆ hloi hla ar asong ming man. Tĕh hơlih âu ki 'nŏh jĭ ƀai hŏk tôch gĭt kăl. Asong tuh 5.000 tân tĕh, jô̆ hơdrom tŏk truh 8.000 tân, đei dơ̆ng dôm 'măng ‘mi dơ̆ng kơ jing tŏk truh jĭt dôm rơbâu tân... Pơm glăi tơdrong vei sơđơ̆ng tơlei unh điên, vă akhan hlŏh tơdrong gơ̆h asong jang. Pơm taluy ưh đei kiơ̆ tơdrong hơgăt đơ̆ng dêh char 'năi, pơm kơjung hlŏh 4m, pơm taluy thoi nŏh kŭm ưh kơ trŏ kơna jing đei tĕh hơlih tôch ơh thoi noh”.

Tơ̆ Hop akŏm Jơnŭm pơgơ̆r kon pơlei dêh char Gia Lai ‘nao âu ki ‘năi, dôm bơngai tang măt akŏm pinh hơlen lơ tơdrong tơtŏ găh tơdrong ming man tơ̆ tơring. Lơ̆m nŏh, tơdrong pơm hnam homestay, hnam tih glăi luơ̆t tôch tơtŏ đon tơpôl. Yoa ưh jăh chih pơkĕh dôm tơdrong tơproh trong jang tơ̆ dôm tơring kơna sư jing tơdrong găn trong vă bơ̆ jang dôm tơdrong tơmât jên jang. 

Ƀok Nguyễn Bá Thạch- Kơdră Anih vei lăng tơdrong ming man dêh char Gia Lai akhan, tơdrong vei lăng tĕh đak găh ming man tơ̆ tơring oei tam mă kơjăp. Lơ anih man glăi đĭ man đang bơih ‘nao ƀôh, jing pơmat tat mưh sek tơlang. Đon pơm kiơ̆ luơ̆t đơ̆ng kon pơlei tam mă jrŭ, lơ bơngai băt glăi ră mă lei oei pơrơ̆ng pơm đĕch, pơm pơmat tat, pơdui đunh khei ‘năr sek tơlang.

Găh tơdrong ưh jăh tơlĕch dôm tơdrong tơprŏh trong jang, jing đei lơ tơdrong pơmat tat mưh vei sơđơ̆ng tơdrong ming man păng ƀơm ưh ‘lơ̆ng truh tơdrong tơlĕch jên jang kơ tĕh đak, ƀok Nguyễn Bá Thạch tơroi dơ̆ng: Dang ei, tơdrong chĕng hơmet tơring, tơproh trong jang tơ̆ dêh char ‘nao đei hơla kơ 30%, tŏ sĕt hlŏh kơsô̆ jô̆ păh lăp lơ̆m tĕh đak.

Ƀok Nguyễn Bá Thạch pơma: “Athei rim tơring, dôm tơdrong tơprŏh trong jang ưh pă đei yoa bơih, jăh hơlen năng vă hŭt lê̆; akŏm jên vă chih pơjing tơdrong tơproh trong jang mă hơdăh, vă pơm ‘lơ̆ng ăn rim tơdrong jang. Lơ̆m khei ‘năr tam mă mong tôm jên, tơmam vă jang păng khei ‘năr vă tơmât tôm tơdrong jang lơ̆m tơring đei chĕng hơmet ‘nŏh jăh chih tơklĕch hloi tơdrong hơgăt vei lăng vă gơ̆h vei lăng sơđơ̆ng ‘lơ̆ng tơdrong ming man tơ̆ tơring”.