Hơdai hăm dôm tơdrong ‘lơ̆ng, mŭk drăm, tơpôl sơnăm 2023 đơ̆ng dêh char Lâm Đồng tơjră hăm lơ tơdrong pơmat tat, 4/18 tơdrong hơgăt jang ưh kĕh. Mă đơ̆ng mŭk drăm tơpôl oei tŏk truh 5,63% mă lei tam mă sơđơ̆ng păng kơjăp. Tơdrong jang kơmăy, ming man tŏk tŏ sĕt; tơdrong tĕch tơmam tơ̆ teh đak đe, tơdrong jang xa đơ̆ng kon pơlei, anih tĕch mơdro ưh kơ ‘lơ̆ng hiôk yoa kơjă tơmam tŏk hlŏh tơdrong, jên răt iŏk tơmam tŏk.

Tơdrong thu mong jên ăn teh đak kŭm tơƀâp lơ pơmat tat, lơ̆m noh dôm jên thu đơ̆ng thuê̆, jên nôp mưh pơm bơ̆n hla ar âu to lăp đei 87,8%, thu jên đơ̆ng hnam, teh lăp dang 85,8% kơsô̆ tơdra đơ̆ng tơring đĕch. Găh noh dơ̆ng, tơdrong tơlĕch jên jang đơ̆ng teh đak oei hiơ̆, hrŭ ‘mong, chưk pơ ‘ngoăih teh oei tơƀâp lơ tơdrong tơhlăk. Tơdrong sơng iŏk jên jang, mă loi hăm tơdrong jang đei jên jang đơ̆ng teh đak đe tŏk hiơ̆. Tơdrong hơmet ming trong pơm hla ar, hơmet ming anih tơmât jên jang, tĕch mơdro tam mă pơm lăp hăm tơdrong ‘mĕh vă.