Đơ̆ng blŭng sơnăm truh dang ei, Kŏng an dêh char Lâm Đồng akŏm tơdrong jang pơgơ̆r dăr joang, hơlen lăng tơ̆ dôm jăl trong tơm, krê hơmơt, chă ƀôh, pơm hla ar ƀiên ƀan sek phak hloh 2.700 ‘nu pơm glăi et tơdrô hơlăk ƀier. Kiơ̆ kơ đại tá Lê Văn Xuyên, Kơdră Anih vei lăng sơđơ̆ng chinh trĭ lơ̆m tơring, kŏng an dêh char Lâm Đồng, hăm tơdrong pơkăp ưh kơ đei bu gơh tơgŭm ăn, ưh kơ đei tơring kơ̆m, khŭl lĭnh kanh sat vei lăng trong nơnăm dôm anih jang lơ̆m dêh char hlôi sek phak kơ hret rim bơngai pơm glăi.

Anih jang Đảng dêh char, Anih vei lăng kon pơlei dêh char kŭm hlôi tơlĕch ăn lơ hla ar athei sek phak ki luơ̆t tơpăt găh tơdrong Đảng păng khŭl kơdră hăm dôm bơngai pơm glăi ‘noh kang ƀô̆, đảng viên, bơngai jang teh đak, bơngai jang kơ anih jang, tơring lơ̆m dêh char.

Tơdrong sek phak kơhret rim bơngai đĭ et tơdrô hơlăk ƀier mă lei oei huơ̆r gre tơ̆ trong, yak blŭng hlôi hơtŏk ‘lơ̆ng đon tơbăt kơchăng pơm kiơ̆ dôm tơdrong hơgăt păng luơ̆t trong nơnăm đơ̆ng tơpôl, tơgop tơ jur 15% kơ sô̆ ‘măng gre tơ̆m preh băl đei ƀơm truh tơ drô hơlăk ƀier tơ̆ dêh char Lâm Đồng.