Dang ei Đà Lạt đei hloh 2.900 ha hnam pơnĭl lơ̆m tơring teh kơ 10 phương lơ̆m tơring kơdrâ̆m, đei hloh 60% teh pơtăm ‘nhot, pơkao kơ pơlei tơm.  Hăm tơdrong đei ƀôh âu, dêh char Lâm Đồng hlôi tơchơ̆t pơih lê̆ tôm hnam pơnĭl choh pơtăm lĕch đơ̆ng tơring kơdrâ̆m Đà Lạt. Lơ̆m noh, tơchơ̆t truh sơnăm 2025 tơjur 20% hơgăt teh păng truh sơnăm 2030 pă đei oei hnam pơnĭl lơ̆m pơlei tơm Đà Lạt. Vă pơm jang tơdrong âu kăl đei jên mong asong tŏk iŏk hăm jên cheh tŏ sĕt hăm kơsô̆ jên truh 4.820 tih hlj, vă pơih hnam pơnĭl păng tơplih hơdrĕch ‘long pơtăm lơ̆m hnam pơnĭl lĕch pơtăm tơ̆ ‘nguaih.

Kơyuơ noh, Anih Choh jang xa păng Hơtŏk tơring tơrang dêh char Lâm Đồng pơkăl Anih vei jên kơ teh đak Việt Nam pơm jang tơ̆ Lâm Đồng chă hơlen, chih akŏm tơdrong asong tŏk iŏk vă hơtŏk choh pơtăm kiơ̆ trong jang ‘nao, choh pơtăm rơgóh ơđơ̆ng vă tơlĕch trong ăn dôm anih vei jên tĕch pơdro pơm trong hiôk asong tŏk iŏk jên jang, vei sơđơ̆ng ăn hnam pơnĭl gơh pơih ‘nhăk tơlĕch đơ̆ng tơring kơdrâ̆m Đà Lạt.