Hơdai hăm tơdrong pơdơh lê̆ ‘mơ̆i iŏk yua dôm vắc-xin tang găn jĭ tơ̆ rơmo vă dăr hơlen, băt hơdăh tơdrong tơm pơm ăn rơmo iŏk đak toh đei jĭ klak chroh, Anih vei lăng kon pơlei dêh char Lâm Đồng athei Anih vei lăng găh Choh jang sa păng Hơtŏk tơiung tơring tơrang, Anih vei lăng kon pơlei dôm apŭng Đơn Dương păng Đức Trọng klăih song bơngai jang thú y truh tơ̆ rim ŭnh hnam kon pơlei đei rơmo jĭ vă pơtho bơ̆jang kiơ̆ dôm trong jang tang găn jĭ. Mă loi ‘noh, hơlen lăng, vei lăng kơjăp tơdrong jang hơlen lăng jĭ ket ƀuh, ưh kơ lê̆ đei ƀôh tơdrong tĕch hăt hot, chơ kon tơrong đei jĭ dăh ket ƀuh rơmo đei jĭ lơ̆m tơring đei jĭ; vei lăng kơjăp tơdrong chơ kon tơrong lĕch đơ̆ng tơring, apŭng, dêh char, mă loi ‘noh jĭ hăm kơ pô rơmo, rơmo iŏk đak toh đei hơmơt kơ jĭ.

Nhen Radiô nơ̆r pơma Việt Nam hlôi tơroi, rơbâu tŏ rơmo iŏk đak toh tơ̆ 2 apŭng Đơn Dương păng Đức Trọng kơ dêh char Lâm Đồng đei ƀôh rơmo ưh kơ xa, jĭ klak chroh lĕch pham đang kơ ‘noh lôch. Jô̆ truh 9/8, anih jang kơpal tơring chih iŏk đei hloh 3.700 tŏ rơmo iŏk đak toh đei jĭ klak chroh păng hloh 100 tŏ rơmo iŏk đak toh hlôi đei lôch.