Anih vei lăng kon pơlei dêh char Lâm Đồng athei dôm apŭng, pơlei tơm Đà Lạt păng Bảo Lộc hơnơ̆ng hơlen lăng, dăr lăng pơ đĭ dôm hơnih kon pơlei oei, hnam trưng hŏk, hnam pơgang, anih bơ̆jang, kơ đông lĭnh tơ̆ dôm tơring tơ ter đak krong, đak glung, tơring tơ ter krang vă tơ tom chă ƀôh, tơroi tơbăt hơdrol tơring đei hơmơt kơ teh hơlih, đak lŏk jroh, đak lơ̆p.

Mă loi ‘noh, Anih vei lăng kon pơlei dêh char Lâm Đồng athei dôm tơring lơ̆m dêh char jăh pôk rĭ, tơklăh hloi dôm ŭnh hnam kon pơlei, bơngai jang lơ̆m anih jang tơ̆ tơring jơ̆ng kông, tơring đei krang tih krê hơmơt kơ teh hơlih vă vei sơđơ̆ng ‘lơ̆ng hơkâu jăn păng mŭk drăm. Hơdai hăm, kơchăng bơ̆jang kiơ̆ trong jang hơmet ăn, tơgŭm, sơđơ̆ng hơnih oei pơgia păng tơdrong arih sa ăn dôm ŭnh hnam kon pơlei athei pôk rĭ oei tơ̆ nai. Hơdrô̆ tơring trong krang Bảo Lộc, kăl kơ đei trong jang bơ̆jang prăt năr prăt măng lơ̆m ‘năr đei ‘mi tih, đei trong jang hơmet pơ ‘lơ̆ng vă tơƀưh dơ̆ng trong nơnăm hrĕnh hloh tơdăh đei tơdrong truh.