Lơ̆m noh dôm anih jang, pơvih pơvăn ăn tơdrong chă tơmang lăng kơ dêh char hlôi đei hơmet ming pơ ‘lơ̆ng, pơm hơtŏk tơdrong ‘lơ̆ng đơ̆ng tơmam pơyoa ăn chă tơmang lăng. Kŭm hăm vei lăng ‘lơ̆ng tơdrong pơvih pơvăn, anih chă tơmang lăng dêh char Lâm Đồng oei tơlĕch “năr măih”, “jơ măih”, sơng lơ anih jang lơ̆m dêh char vang jang kiơ̆ păng tơlĕch lơ trong tơgŭm, hơpăh nhen tơjur jên ƀich tơ̆ hnam hotel, yă vĕ mât tơmang lăng, hơpăh tơmam, asong chă thông ngôi đĕch tơ̆ 1,2 tour chă tơmang lăng… vă sơng tơmoi truh.

Lơ̆m giĕng măih Chă tơmang lăng Lâm Đồng sơnăm ‘nâu đei hơnăn “Lâm Đồng – Anih pơkă đơ̆ng Pơkao păng Boa hơri”, jĭ tơdrong gĭt kăl, pơih blŭng ăn tơdrong chă tơmang lăng pơyan he sơnăm 2024. Yoa thoi noh, ‘ngoăih kơ vei lăng ‘lơ̆ng dôm tơmam pơvih pơvăn, tơdrong vei lăng teh đak găh rim tơdrong jang kŭm đei dôm anih jang kơpal lơ̆m dêh char tơlĕch jang kiơ̆.