Kiơ̆ đơ̆ng chih măt vang pơ long trực tuyến, dêh char Lâm Đồng đei vă jê̆ 14.900 ‘nu hŏk tro chih măt vang pơ long tốt nghiệp THPT sơnăm 2023, tŏk 740 hŏk tro chih măt vang pơ long pơtêng hăm ‘măng pơlong sơnăm sơ̆.

Kiơ̆ kơ ƀok Huỳnh Quang Long, Phŏ Kơdră chĕp kơ̆l Anih vei lăng găh pơtho pơhrăm Lâm Đồng, anih jang tơchĕng hơdrol gô hơmet ăn 627 lăm pơlong tơ̆ 39 hơnih pơlong tơ̆ dôm apŭng, pơlei tơm lơ̆m dêh char. Kŭm hăm vei sơđơ̆ng hiôk ‘lơ̆ng găh anih jang tơmam drăm, Anih vei lăng găh pơtho pơhrăm Lâm Đồng kŭm vei sơđơ̆ng bơngai jang, tơlĕch jang pơhrăm tơdrong hơgăt pơ long ăn đĭ đăng dôm kơdră chĕp kơ̆l, kang ƀô̆, thây kô pơtho vang vei lăng ‘măng pơ long.