Hơnơ̆ng lơ̆m gơmăng ‘năr mônh păng ‘năr puăn rim iĕng, lăm hŏk xut xa ưh kơbăt kơ chư tơ̆ pơlei Kret Krot, tơring H’Ra, apŭng Mang Yang ƀrach hơdăh, nơ̆r rơ ông chă đŏk chư đơ̆ng rim bơngai hŏk. Lăm hŏk au đei 40 ‘nu, đơ̆ng hơ ioh truh tơ̆ đe mĕ ƀă ‘noh bơngai Bahnar kơ pơlei Kret Krot.

Đơ̆ng rŏng mĭnh năr bơ̆ jang gleh hrat, mŏ Sen (45 sơnăm, hlôi năm truh tơ̆ lăm hŏk ƀlep jơ vă hŏk chih chư. Nhen lơ pơlai oh anai đĕch, mŏ Sen iŏk ŭnh om đơ̆ng hrôih, ưh kơ đei hŏk pơhrăm. Dang ei vang hŏk lăm hŏk xut xa ưh kơbăt kơ chư, mŏ kơrŭn jơhngơ̆m kơ yuơ ‘nau jĭ jơ rơvơn hloh ăn kơ dih kau.

“Ĭnh ưh kơbăt chư, ‘meh năm hŏk vă băt kơ chư, vă băt chih hơnăn kơdih ĭnh, chă năm tơ̆ au tơ̆ to ‘noh băt chih hơnăn ba”.

Jei lei lăi, mŏ Mah (29 sơnăm) oei lơ̆m pơlai au mơ̆n jei năm hŏk đơ̆ng rŏng mĭnh năr jang chŭn mir. Tơpang ti hơrăng hơrŏ kơ bơngai lăp joăt chĕp ‘nhik tơgăk, pŭ reo, dang ei hơngŭr chă chih chư, kơsô̆. Mă đơ̆ng tơnap tap, mŏ Mah jei hơdrin hŏk pơhrăm kơ yuơ lui akhan, tơdrong băt chư gô tơgŭm lơ tơdrong ăn kơ ih kau, ŭnh hnam.

“Ĭnh ‘meh hŏk vă băt kơ chư, vă ning nai kai ning mônh kơnh năm tơ̆ yơ, ba băt chư ‘noh rơvơn hloh. Jăh nhen dang ei, ba ưh kơbăt kơ chư ba năm tơ̆ yơ đe jei jơ jŏk, nhen mĭnh năr au ki năm tơ̆ hnam pơgang ba kon hơmet jĭ, đe athei chih hơnăn ‘noh ba ưh kơbăt kơna ƀak si hil kơna dang ei hli dêh. Dang ei lăp ‘meh năm hŏk vă băt kơ chư, vă ning nai nai ning mônh năm tơ̆ au tơ̆ to jei hiôk ƀiơ̆”.

Pơma dơnuh hăm kon pơlei tơ̆ tơring, Trung uý Lê Tuấn Thành – kang ƀô̆ Kŏng an tơring H’Ra, apŭng Mang Yang, dêh char Gia Lai băt hơdah tơdrong ưh kơ hiôk hăm kon pơlei. Ưh kơ băt chư noh kon pơlei ƀơm lơ tơnap tap ƀơ̆t năm pơm hla bơ-ar kăl tơ̆ anih jang kơpal tơring. Kơyuơ thoi noh, đei tơdrong drơ̆ng nơ̆r đơ̆ng đe kơdră kơpal, jơnŭm pơgơ̆r tơring, Trung úy Thành jing hê̆ ƀok thâi pơtho tơgŭm ăn kon pơlei băt chư, băt jô̆ hơlen, đơ̆ng noh tơplih đon tơchĕng, trong pơm jang vă hơtŏk muk drăm: “Khei năr blŭng oei tơnap tap kơlih kon pơlei ưh kơ pơ̆n năm hŏk chư. Kon pơlei bơngai Bahnar ‘noh pơma dơnuh hăm kon pơlei tơnap tap kơlih ưh kơ băt nơ̆r pơma, ưh đei tơguăt dih băl, ưh kơ băt gah tơdrong kăp gĭt. Vă pơtoi vei lăm hŏk đunh khei năr tơguăt hăm tơdrong jang chĭnh trĭ, rim kơdră thôn, đe kŏng an, tơguăt hăm tơdrong hŏk tơnăp ‘noh đei iŏk tơmam hơpah ăn bơngai hŏk”.

Tơring H’ra, apŭng Mang Yang, dêh char Gia Lai đei 9 thôn, pơlei, măt kon pơlei kon kông đei truh 2/3, mă lơ noh kon pơlei Bahnar. Ƀok Dung – Kơ-iĕng kơdră Anih jang vei lăng kon pơlei tơring H'ra ăn tơbăt, tơdrong mă ƀok thâi Lê Tuấn Thành pơtho chư atŭm hăm chă tơroi hơvơn ăn  kon pơlei băt vao, tơgŭm ăn Kŏng an tơ̆ tơring tơguăt hloh hăm kon pơlei, jang tơnăp tơdrong jang hơvơn pơtho kon pơlei. “Hŏk chư ‘noh kon pơlei hlôh vao hloh, chă tơroi tơbăt adoi hiôk hian hloh, đơ̆ng rŏng kơnh kon pơlei chă pơm  jang, răt phŏng, pơgang ‘măn ăn tơdrong choh jang, hơtŏk mŭk drăm ƀônh ƀŏ hloh. Jơnŭm pơgơ̆r tơring chă pơtho akhan hăm kon pơlei băt tang găn gah tơdrong tơ-oei unh om đơ̆ng ‘lơ̆p, tơ-oei ‘nhŏng oh yă ƀok, ‘noh kon pơlei ƀônh băt hloh. Hơpơi ‘meh lăm hŏk âu đei pơih tơ̆ pơlei Kret, Krot ‘noh đơ̆ng rŏng kơnh gô đei pơih să tơ̆ dôm pơlei pơla nai dơ̆ng”.