Kiơ̆ kơ ‘noh, Kơ iĕng Thủ tướng Teh đak Trần Hồng Hà pơjao ăn Hơnih tơm vei lăng Trong gre nơnăm pơm tơm, iung jang hơdoi hăm Hơnih tơm Pơprŏ tơdrong jang-Tơmơ̆t jên jang păng rim hơnih bơ̆ jang ƀơm truh lăng hơlen nơ̆r apĭnh đơ̆ng Hơnih vei lăng kon pơlei dêh char Khánh Hòa, Hơnih vei lăng kon pơlei dêh char Lâm Đồng, tơroi tơbăt ăn Thủ tướng Teh đak hơdrol năr 30/10/2024. Kơdră chĕp pơgơ̆r 2 dêh char drơ̆ng mĭnh nơ̆r apĭnh Kơdră chĕp pơgơ̆r Teh đak pơjao ăn Hơnih vei lăng kon pơlei dêh char Khánh Hòa pơm hơnih jang gơ̆h tơchơ̆t Tơdrong vă jang PPP tơmơ̆t jên jang pơm trong gre rĕnh Nha Trang - Đà Lạt. Akŏp trong hơtăih hloh 80km, lơ̆m ou đei jăl trong yak hloh dêh char Khánh Hòa dang 44km, jăl trong găn hloh dêh char Lâm Đồng dang 36km 800 met. Tơdrong vă jang ou akŏp kon jên tơmơ̆t jang dang 25.000 ti hlak jên. Khei ‘năr ming man đơ̆ng sơnăm 2024 truh sơnăm 2028. Tơdrong vă jang trong gre rĕnh tơgoăt 2 tơring tơmang pơiơ̆ tih Nha Trang- Đà Lạt đei ming man gô pơtrŭt kơtang tơdrong yak vih vơ̆t dih băl ‘lơ̆ng hơ iă lơ̆m tơring, atŏk tơ iung mŭk drăm, adoi vei lăng sơđơ̆ng dơ̆ng kơjăp tơring, teh đak.