Sơnăm 2018, Y Vui Ayun apĭnh lơ̆m dân quân tự vệ tơring Ea Kao, pơlei tơm Buôn Ma Thuột. Hloh 6 sơnăm tơklep hăm khul au, ‘nhŏng hơnơ̆ng atŏk kơtang jơhngơ̆m đon hơdrin, ưh kơ ‘nhoen tơdrong pơmat tat hơdrin kơtang lơ̆m pơhrăm, kơchăng iung tơblăh, jang kiơ̆ ‘lơ̆ng tơdrong jang chă pơrô̆ pơrôp kon pơlei, sơđơ̆ng tơring, tang găn tŏ ‘mi kial pơrăm. Mă kăl lơ̆m ‘măng jĭ hơbuh Covid-19 lơ̆m sơnăm 2020-2021, ‘nhŏng apĭnh năm tơ̆ tơring đei jĭ hơbuh vă tơgŭm rim bơngai tang găn jĭ hơbuh. Atŭm hăm ‘noh, ‘nhŏng jei hơdrin jang mir pơgar atŏk muk drăm ăn ŭnh hnam. Hăm 1 ha chehphe pơtăm hrou sâu riêng, dang ei mĭnh sơnăm mir pơgar ‘nhŏng jang sa iŏk đei 300 triu hlak jên. ‘Nhŏng tơroi, gơnơm jang ‘lơ̆ng dôm tơdrong pơjao păng jang sa hơgei, sơnăm 2022, ‘nhŏng ‘noh mĭnh lơ̆m dôm kon pơlei ‘lơ̆ng đei chi ƀô̆ ƀuôn Huê, tơring Ea Kao pơtruh ăn năm hŏk lăm hŏk hlôh vao găh Đảng păng đei pôk tơmơt jang lơ̆m khul Đảng đơ̆ng rŏng kơ ‘noh mĭnh sơnăm. Đảng viên Y Vui tơroi:“Mưh đei mơ̆t lơ̆m khul Đảng, ba tôch hưch hanh hơmanh bơnê. Ba ling lang hơdrin jang keh đang rim tơdrong đei pơjao, păng yŭk trong hơlau lơ̆m jang sa xut xa pơngot rơvĕt tơjur dơnuh. Mưh đei jing đảng viên tơpă, ba jei hơnơ̆ng hơdrin, hŏk pơhrăm, jang keh đang tơdrong jang đei pơjao.”

Lơ̆m sơnăm 2023, jô̆ hơdrô̆ Hơnih chĕp pơgơ̆r kuân sư̆ tơring Ea Kao, hlôi đei 3 dân quân tự vệ đei pôk tơmơ̆t jang lơ̆m khul Đảng. Đĭ đăng jĭ dôm bơngai ‘lơ̆ng, đei lơ tơdrong hơdrin lơ̆m jang kiơ̆ tơdrong jang, pơhrăm jơhngơ̆m đon oei sa ‘lơ̆ng, vang pơhrăm tơblăh iŏk đei jơnei ‘lơ̆ng adoi nhen vang atŏk tơ iung mŭk drăm ŭnh hnam. Jĭ mĭnh lơ̆m 3 ‘nu bơngai ‘lơ̆ng kơ Hơnih chĕp pơgơ̆r kuân sư̆ tơring Ea Kao đei pôk tơmơ̆t lơ̆m sơnăm 2023, đảng viên Nguyễn Thanh Tùng, hưch hanh hơmanh bơnê pơma: “Hăm hơnăp jang jĭ mĭnh ‘nu đảng viên, ba hơdrin jang ‘lơ̆ng tơdrong jang kơdih truh hloi tơ̆ hơnih bơ̆ jang adoi nhen tơ̆ ŭnh hnam. Kơdih ba kăl pơm kiơ̆ ‘lơ̆ng jơ ‘năr bơ̆ jang kơ khul dân quân tự vệ, pơhrăm jơhngơ̆m đon nuih mơng, tơdrong iung tơblăh, jang keh đang rim tơdrong jang Chi ƀô̆, Hơnih chĕp pơgơ̆r kuân sư̆ tơring pơjao, vang jang vei lăng năng tông sơđơ̆ng lơ̆m tơring, pơlei.”

Tơring Ea Kao đei 14 thôn ƀuôn, hăm hloh 20.000 ‘nu măt bơngai, lơ̆m ou đei dang 45% ‘noh hơdrung kon kông. Đảng ƀô̆ tơring đei vă jê̆ 350 đảng viên, hop akŏm tơ̆ 23 chi ƀô̆. Ƀok Y Mnông Hđơk- Bí thư Đảng tơring tơbăt, jang kiơ̆ bơ̆ jang atŏk tơ iung Đảng, mă kăl lơ̆m khul dân quân tự vệ, rim Kơdră chĕp pơgơ̆r đảng, Chi ƀô̆ Đảng pơlei pơla hlôi pơchoh trong ăn khul kơdră Đảng tơring pơrôp, pơjao đảng viên dăr lăng tơgum djru, tơƀôh tơbăt dôm kon pơlei ‘lơ̆ng vang năm hŏk pơhrăm tơchă hlôh vao găh Đảng păng hơlen pôk tơmơ̆t. Ƀok Y Mnông pơma:“Sơnăm 2024 nhôn sơkơ̆t pôk tơmơ̆t 2 đảng viên lơ̆m khul dân quân tự vệ. Dang ei lơ̆m Hơnih chĕp pơgơ̆r kuân sư̆ tơring, hlôi chă pơtho ăn 2 ‘nu kon pơlei ‘lơ̆ng chih lĭ lĭch đảng vă năm lăng hơlen păng lơ̆m jăl III gô pơgơ̆r pôk tơmơ̆t.”

Pơlei tơm Buôn Ma Thuột đei 13 phường păng 8 tơring, hăm vă jê̆ 400.000 ‘nu măt bơngai, lơ̆m au dang 1.900 ‘nu ‘noh dân quân tự vệ, măt bơngai đảng viên hrei au đei 25%. Kiơ̆ đơ̆ng Thượng tá Mai Văn Khuê, Kơ iĕng Ƀĭ thư Đảng ủy Quân sự pơlei tơm Buôn Ma Thuột -Chĭnh trĭ viên Hơnih chĕp pơgơ̆r kuân sư̆ pơlei tơm, vă tơ iung pơjing khul dân quân tự vệ pran kơjăp iăp kơtang tôm tong găh chinh trĭ păng atŏk jơhngơ̆m đon kơchăng iung tơblăh ‘noh tơdrong chă rơih, pơjing khul, atŏk tơ iung đảng viên lơ̆m khul au ling lang đei Hơnih Đảng pơlei tơm păng rim khul kơdră Đảng tơring lăng ba kơjăp, tơlĕch jang kiơ̆ kơtang.

Thượng tá Mai Văn Khuê tơbăt, vă atŏk đảng viên lơ̆m khul dân quân tự vệ, Đảng uỷ, Hơnih chĕp pơgơ̆r kuân sư̆ pơlei tơm iung jang pơchoh trong ăn Khul kơdră chĕp pơgơ̆r Đảng pơlei tơm pơm tơlĕch rim Nơ̆r athei jang kiơ̆ găh atŏk kơtang chĕp pơgơ̆r tơdrong jang vei lăng teh đak, vei lăng sơđơ̆ng tơring; sơkơ̆t hơdăh pơjao ăn dôm yơ, măt bơngai pôk tơmơ̆t đảng viên lơ̆m khul au kiơ̆ trong pơprŏ tơlĕch ăn.“Nhôn iung jang hơdoi hăm Khul kơdră chĕp pơgơ̆r Pơlei tơl pơjao ăn ,kơdră chĕp pơgơ̆r Đảng rim tơring, phương, rim sơnăm mĭnh tơring pôk tơmơ̆t đei đơ̆ng 2 đảng viên năm tơ̆ lơ. Mă lei tơdrong mă au hrei ‘nou, lơ hơnih hlôi pôk tơmơ̆t đei 3, đei ‘măng truh 4 ‘nu đảng viên.”

Hăm tơdrong lăng kơjăp tơ iung pơjing păng atŏk tơ iung đảng viên lơ̆m khul dân quân tự vệ tơ̆ pơlei tơm Buôn Ma Thuột, khul kang ƀô̆ tơring hơnơ̆ng tơlĕch jang kiơ̆ kơjăp hăm tơdrong ‘lơ̆ng, tơmơ̆t pơtăl ăn, hơnơ̆ng. Tơdrong chĕp pơgơ̆r, jơhngơ̆m iung tơjră kơ khul kơdră chĕp pơgơ̆r Đảng tơring, chi ƀô̆ păng khul đảng viên lơ̆m khul dân quân tự vệ ling lang atŏk pran kơtang, tơgop lơ̆m jang kiơ̆ ‘lơ̆ng tơdrong jang vei lăng sơlam teh đak, sơđơ̆ng tơring kơjăp iăp kơtang.