Bí thư Đảng pơlei tơm HCM Nguyễn Văn Nên kŭm hăm kơdră chĕp kơ̆l dang ei, kơdră chĕp kơ̆l Đảng, Teh đak, kơdră chĕp kơ̆l pơlei tơm HCM adrol ki, dôm khul linh, anih jang kơpal, khul grŭp tơpôl, khul bơngai jang tơbôl kơ dôm teh đak tơ̆ pơlei tơm, khul bơngai tang măt ăn dôm dêh char, plt găh Pơbăh kŭm hăm lơ kon pơlei truh kŭp kơ̆l, mât hơpong Tổng Bí thư Nguyễn Phú Trọng hăm jơhngâm đon ‘mêm tôch pơnach, hmach tôch pơneh.

Ƀok Nguyễn Văn Nên chih lơ̆m kơsơ̆p hla ar pơdong, đei trong: “ Nhôn ling lang ƀlŏk truh 1 ‘nu bơngai tơpăt ‘lơ̆ng, ưh đei pơang pơrŏ, đei đon adrin tôch tôch; mĭnh jơhngâm đon tih; 1 ‘nu kăn ƀô̆ đảng viên ‘lơ̆ng, hơđơ̆ng jơhngâm, ưh hli kiơ; mĭnh ‘nu kơdră chĕp kơ̆l rơgei, đei jơhngâm đon ‘lơ̆ng, tôch nuih; mĭnh ‘nu bơngai tơƀôh trong chong glung vă hŏk pơhrăm, jang kiơ̆ đon tơchĕng, jơhngâm đon ‘lơ̆ng đơ̆ng Ƀok Hô. Apinh hŏk pơhrăm, pơm kiơ̆ ih păng dôm bơngai chĕp kơ̆l tôch rơgei đơ̆ng chăl adrol, apinh hơngăh vă pơm kiơ̆ mă ‘lơ̆ng, mât mĭnh ƀơ̆r đon, adrin hlŏh dơ̆ng, khŏm bơ̆ jang lơ hlŏh dơ̆ng, adrin pơjing pơlei tơm HCM “’Lơ̆ng rŏ hơnăn Măih” nhen ih hơpơi ‘mĕh, pơtho tơƀôh, vang tơgop kŭm hăm teh đak, yoa teh đak vă pơjing păng vei lăng teh đak Việt Nam roi đunh roi rơgei, hiôk chơt, hơnŭk hơnoa. Apinh pơtruh ăn unh hnam ƀok Nguyễn Phú Trọng nơ̆r sơ ‘ngon dêh hlŏh”.