Nhen Radiô nơ̆r pơma Việt Nam hlôi tơroi pơgê brei, 25/7, tơ̆ Hnam hop akŏm tơm Thống nhất (pơlei tơm Hồ Chí Minh) păng pơlei tơ̆ hnam plei Lại Đà, xăh Đông Hội, apŭng Đông Anh (pơlei tơm Hà Nội), Khŭl chĕp kơ̆l pơgơ̆r Trung ương Đảng, Quốc hội, Kơdră teh đak, Khŭl kơdră teh đak, Anih jang Trung ương Mặt trận Tổ quốc Việt Nam păng ŭnh hnam hlôi pơgơ̆r tih Lêh hơpong Nguyễn Phú Trọng, Tổng Bí thư Khŭl chĕp kơ̆l pơgơ̆r Trung ương Đảng Cộng sản Việt Nam, kiơ̆ trong hơpong pơdong jơ̆p lơ̆m teh đak. Lêh hơpong Tổng Bí thư Nguyễn Phú Trọng đei pơgơ̆r tơpăt ‘lơ̆ng, ƀrơ̆k jơ hngơ̆m. Lơ̆m jơhngơ̆m đon ‘mêm kơ eng tôch kơ dêh, Khŭl chĕp kơ̆l pơgơ̆r Trung ương Đảng yua đơ̆ng ƀok Tô Lâm, kơdră jang lơ̆m Anih tơm Chĭnh trĭ, Kơdră teh đak Cộng hòa Xã hội Chủ nghĩa Việt Nam pơm Kơdră khŭl chông hơdrol mơ̆t hơpong ƀok Nguyễn Phú Trọng. 

Khŭl kơdră teh đak yua đơ̆ng Phạm Minh Chính, Kơdră jang lơ̆m Anih tơm Chĭnh trĭ, Thủ tướng Teh đak pơm Kơdră khŭl mơ̆t hơpong păng vang sơ ‘ngon kŭm ŭnh hnam ƀok Nguyễn Phú Trọng. Tôch ‘mêm kơ eng Tổng Bí thư Nguyễn Phú Trọng, Khŭl kơdră teh đak Cộng hòa xã hội chủ nghĩa Việt Nam yua đơ̆ng ƀok Tô Lâm, Kơdră jang lơ̆m Anih tơm Chĭnh trĭ, Kơdră teh đak pơm kơdră khŭl mơ̆t hơpong păng vang sơ ‘ngon hăm ŭnh hnam Tổng Bí thư Nguyễn Phú Trọng. Khŭl Quốc hội yua đơ̆ng ƀok Trần Thanh Mẫn, Kơdră jang lơ̆m Anih tơm Chĭnh trĭ, Kơdră Quốc hội pơm Kơdră khŭl mơ̆t hơpong ƀok Nguyễn Phú Trọng păng vang sơ ‘ngon hăm ŭnh hnam ƀok.