Hơdrol ‘noh, năr mă blŭng lêh pơjao iŏk lĭnh hlôi pơgơ̆r tơ̆ 30 dêh char pơlei tơm lơ̆m teh đak, rơbăn hơdruh tơdăm hlôi chhôk hơiă năm pơm ƀô̆ đô̆i, vei sơđơ̆ng tôm kơsô̆ bơngai, ‘lơ̆ng, pơgơ̆r năm tơ̆ anih jang ƀlep jơ năr, tôch kơ sơđơ̆ng. Sơnăm ‘nâu lơ̆m pơlei tơm Hà Nội đei 1.471 ‘nu kon pơlei chih hla ar apĭnh năm pơm ƀô̆ đô̆i. Đại tá Đào Văn Nhận, Phŏ Tư lệnh pơm hloi Kơdră jang tơgŭm Anih tơm Tư lệnh anih tơm Hà Nội tơbăt 8 jơ pơgê, lêh pơjao iŏk lĭnh vang pơgơ̆r tơ̆ 30 quận, apŭng kơ pơlei tơm Hà Nội. Dang ei 3.700 ‘nu kon pơlei năm pơm lĭnh ƀô̆ đô̆i păng 794 ‘nu pơm lĭnh kŏng an kon pơlei hlôi năm tơ̆ anih jang.

Tơ̆ Thanh Hoá, mă đơ̆ng ‘năr tơ ngiĕt păng đei ‘mi ƀơ ƀreh mă lei ưh kơ pơm ƀơm ưh kơ ‘lơ̆ng truh jơhngơ̆m đon chhôk ‘nă đơ̆ng hloh 3.650 ‘nu lĭnh hle. Dôm tơring hlôi hơmet ăn ‘lơ̆ng dôm tơdrong hiôk kăl vă jơ pơm lêh đei pơgơ̆r chơt hơiă, ba đe lĭnh hle năm jang hơnăp jang pơjao.