Akŏm kơchơ đei 300 anih ‘măn akŏm hăm dôm tơmam drăm ‘lơ̆ng, đei pơtruh đơ̆ng 120 anih jang mŭk drăm, anih pơm tơlĕch tĕch pơdro kăp gĭt kơ 12 dêh char, pơlei tơm tơ̆ teh đak Việt Nam, Campuchia, Lào.

Akŏm kơchơ đei lăng jing anih kăp gĭt vă hơtŏk jang tơbôl, jang hadoi gah mŭk drăm, tĕch pơdro đơ̆ng dêh char An Giang – Việt Nam păng 2 dêh char Takeo, Kandal (kơ teh đak Campuchia), hăm pơkăp hơtŏk tĕch tơmam drăm ăn dôm teh đak ASEAN pơma hơtŭm, dôm teh đak tơ̆ tơring đak krong Mê-kông pơma hơdrô̆. Mă kăl, akŏm kơchơ sơnăm âu oei đei tơdrong vang akŏm đơ̆ng dêh char Champasak (teh đak CHDCND Lào), kiơ̆ đơ̆ng noh tơgop hơtŏk pran tơdrong jang tơbôl juăt jue ‘lơ̆ng rŏ đơ̆ng Việt Nam, Lào, Campuchia pơma hơtŭm păng An Giang hăm Champasak, Tàkeo, Kandal pơma hơdrô̆.