Lêh sầu riêng Krông Pắc – Đắk Lắk ‘măng mă 2 gô pơm lăp đon tơmoi hăm pơgơ̆r tih, lơ tơdrong jang hơiă, ‘lơ̆ng hloh, ‘nâu jĭ nơ̆r pơma hơdăh đơ̆ng kơdră chĕp kơ̆l apŭng Krông Pắc, dêh char Đắk Lắk tơ̆ jơ hop akŏm roi tơbăt găh lêh sầu riêng Krông Pắc- Đắk Lắk ‘măng mă 2 sơnăm 2024 pơgơ̆r pơgê brei (18/7). Hăm hơnăn “Sầu riêng Krông Pắc - Hơtŏk tơiung păng mơ̆t jang hơdai”, lêh gô pơgơ̆r đơ̆ng ‘năr 31/8 truh ‘năr 2/9/2024. Yă Ngô Thị Minh Trinh - Phŏ Kơdră Anih vei lăng kon pơlei apŭng Krông Pắc tơbăt: lơ̆m apŭng dang ei đei dang 8.000 hec-ta pơtăm sầu riêng, đei 1/3 hơgăt teh đak sầu riêng kơ lơ̆m dêh char Đắk Lắk. Sơnăm ‘nâu, tơchĕng hơdrol akŏm kơsô̆ plei đei hloh 92.000 tấn.  

Sầu riêng hlôi jing ‘long pơtăm tơm hơnhăk ăn iŏk yua tơm ăn kon pơlei tơring. Lêh sầu riêng apŭng Krông Pắc ‘măng mă 2, đei pơgơ̆r tih ƀiơ̆, ‘lơ̆ng ƀiơ̆, lơ tơdrong jang ‘lơ̆ng hơiă ƀiơ̆ gô hơnơ̆ng pôk pơ ư bơngai pơtăm sầu riêng păng dôm kơjă mŭk drăm đơ̆ng kơloăi plei ‘long ‘nâu hơnhăk ăn.