Lêh tơbăt, nơnăm pơrŏ đơ̆ng khŭl lĭnh pơ tơm blŭng hơiă hăm prăh 21 tŏ kơnong kiơ̆ ƀai hơri kơ teh đak Cộng hòa xã hội Chủ nghĩa Việt Nam. Đơ̆ng rŏng kơ ‘noh tơdrong păr pơrŏ đơ̆ng khŭl gre vơvêl chep ba hla kơ Đảng, hla kơ Teh đak păr brih hơnih pơm lêh. Đơ̆ng rŏng kơ ‘noh dôm ƀai đŏk, iung pơma đơ̆ng Thủ tướng Phạm Minh Chính, tang măt khŭl lĭnh Điện Biên, tang măt jơhnơr mơlôh; tơdrong lêh pơjao Mê đai rơngei hiôk hian dơ̆ng mă Mônh ăn kơ Đảng bộ, khŭl kơdră păng kon pơlei dôm hơdrĕch hơdrŭng dêh char Điện Biên păng hơtuch ‘noh jĭ tơdrong năm pơrŏ đơ̆ng khŭl lĭnh tôch kơ tih.

Akŏm khŭl lĭnh vang akŏm năm pơrŏ hloh 12.000 ‘nu. Khŭl gre vơvêl păr brih dôm hơnih gru groa gĭt kăl nhen Đồi A1, pơsat Đồi A1, Rup man Tơblăh jơnei Điện Biên Phủ, Anih ‘măn răk tơmam drăm so Điện Biên Phủ..., rim grŭp năm pơrŏ đơ̆ng lĭnh tôch kơ tih yak mơ̆t lơ̆m hơnih pơm lêh đei hloi nơ̆r pơma hơdăh tơƀôh jơhngơ̆m pran tôch kơ dêh đơ̆ng grŭp tơgoăt tơgoăl đĭ đăng hơdrĕch hơdrŭng hăm tơdrong chĕp kơ̆l đơ̆ng Đảng Cộng sản Việt Nam păng Kơdră Hồ Chí Minh, pơm jing Jơnei Điện Biên Phủ “đei ư hơnhang jơ̆p tơring, pơm tơdrŏ jơ̆p plĕnh teh”.