50 sơnăm đơ̆ng năr đei iŏk jơnei, Đảng ƀô̆ păng Kon pơlei apŭng Kon Plông hlôi chĕp vei tơdrong juăt jue tơguăt tơguăl, gơh hơgei, đei yua lơ lơ̆m hơtŏk mŭk drăm – tơpôl. Ƀai đŏk ah jơ lêh ră hơdah: “Kon Plông tơplih rim năr, tơdrong hơrih roi năr roi jơnap hơtŏk tơ-iung ‘nao. Tơpă tôm linh lôch tang nuih mơng hơdrol kơ lôch hơchăng kơyuơ kơ pơlei pơla, teh đak adoi đei hơtŭm tơdrong hơpơi ‘meh noh Teh đak gơh đei jơnei rơngei hiôk hian, Kon pơlei phĭ tơtŏ dơnŏ ‘lơ̆ng”.

Pơma ah lêh tơbăt, ƀok Lê Ngọc Tuấn, Kơdră Anih jang vei lăng kon pơlei dêh char Kon Tum, sơkơ̆t hơdah: “Tơbăt 50 sơnăm Đei jơnei Măng Đen, tơblah đei jơnei apŭng Kon Plông jing ‘măng vă vih tơbăt dơ̆ng tơdrong juăt jue kơ jơhnơr hơrih nuih mơng păng pơ-ư pơ-ang gah juăt jue nuih mơng. Lơ̆m jăl kăch mạng ‘nao, Tĭnh uy – Jơnŭm vei lăng kon pơlei – Anih jang vei lăng kon pơlei – Anih jang Măt trâ̆n tôh kuôk Việt Nam dêh char hơnơ̆ng lui ngeh Đảng ƀô̆, khul linh păng kon pơlei kon kông apŭng Kon Plông pơtoi chĕp vei tơdrong juăt jue keh đang tơnăp sơnong jang chĭnh trĭ đei Đảng păng Teh đak pơjao”.