Lêh âu yoa Anih tơm vei lăng Công an, Khul drŏ kăn Việt Nam păng Anih vei lăng kon pơlei dêh char Lào Cai jang hơdoi vang pơgơ̆r. Pơma tơ̆ jơ pơm alêh, Phó Thủ tướng Trần Lưu Quang pơma hơdăh, tĕch mơdro bơngai jĭ 1 lơ̆m dôm tơdrong yoch hơmơt hlŏh lơ̆m apŭng plenh teh.

Tơ̆ Việt Nam, ‘năr 30/7 kŭm đei rơih pơm "Năr đĭ đăng kon pơlei tang găn tĕch mơdro bơngai" vă hơtŏk jơhngâm pran đơ̆ng rim anih jang chinh trĭ păng đĭ đăng kon pơlei lơ̆m tơdrong tơblăh tang găn tơdrong yoch ‘nâu. Phó Thủ tướng krao hơvơn tơdrong adrin vang jang đơ̆ng đĭ đăng kon pơlei păng dôm anih jang, khul grŭp lơ̆m păng ‘ngoăih kơ teh đak vă hơtŏk jơhngâm tang găn pơđĭ tơdrong tĕch mơdro bơngai lơ̆m tơpôl, mă loi năng kăl vei lăng ‘lơ̆ng ăn hơioh păng bơngai ưh pŭn ai, ‘moi kiơ̆ hơnăn sơnăm 2024 ‘nŏh “ưh đei hŭt hơchăng hơiŏh yơ tơ̆ rŏng” lơ̆m tơdrong tơblăh ‘nâu.