Mă hơdăh, dôm anih chă tơmang lăng tơ̆ plt Hồ Chí Minh, Hà Nội, Đà Nẵng păng Quảng Ninh đei lơ ‘măng jur dăr lăng tơ̆ dôm anih chă tơmang lăng ‘lơ̆ng rŏ tơ̆ Dak Lak nhen: Anih chă tơmang lăng ƀât gơng hơnĕh Buôn Đôn, pơgar tĕh đak York Đôn, chă dăr lăng ‘moi kiơ̆ jơ̆ng rôih, vei rong rôih ‘lơ̆ng hơiă; hao thŏng nan klĕch đak krong Sêrêpôk; dăr lăng tơ̆ kông Tơmo rôih mĕ, dơnâu Lắk; năm ngôi mât lăng lơ̆m pơgar ‘long ca cao păng truh lăng tơdrong chă tơmang lăng tơ̆ dôm pơlei chă tơmang păng anih gru groa so.

Dôm khul kŭm dăr lăng tơ̆ dôm hnam hotel đơ̆ng 3 truh 5 sơnglŏng tơ̆ dêh char Dak Lak păng kĭ pơkăp jang hơdoi hăm anih chă tơmang tơ̆ Dak Lak. Đơ̆ng rŏng 4 năr truh dăr lăng, yă Nguyễn Huyền Trang truh đơ̆ng Hà Nội akhan, athei jang hơdoi dơ̆ng hăm dôm dêh char tơjê̆ vă pơgơ̆r chă tơmang lăng jơ̆p tơring, vă tơmoi gơ̆h truh lăng, ngôi pơchơt lơ ƀiơ̆.