Mă loi ‘noh, Hop akŏm đei tơdrong vang truh đơ̆ng 210 ‘nu bơngai tang măt hơgei ăn khŭl hŏk jrŭ, dôm bơngai jang khoa hŏk, bơngai joh hơri hơsoang đei lơ jơnei ‘lơ̆ng hloh lơ̆m tơdrong jang, tơgop pơjing khoa hŏk kơmăy kơmŏk, pơtho pơhrăm kơ teh đak păng joh ayŏ Việt Nam ‘lơ̆ng, ƀĕnh tơdrong hơiă hơdrĕch hơdrŭng.

Pơma tơ̆ Hop akŏm, Kơdră teh đak Võ Văn Thưởng tơƀôh đon bơnê gĭt kăl truh rim jơhnơr hŏk jrŭ, bơngai jang khoa hŏk, bơngai joh hơri hơsoang - dôm bơngai hơgei kơteh đak hlôi plang đon gơh hơgei păng jơhngơ̆m đon, bơ̆jang ưh kơ lap hăm tơdrong ‘mêm kon bơngai păng teh đak, lui ngeh akhan, khŭl hŏk jrŭ, jang khoa hŏk, joh hơri hơsoang Việt Nam mă đơ̆ng tŏk bŏk arih sa păng bơ̆jang tơ̆ lơ̆m teh đak dăh mă teh đak đe, hăm tơdrong ‘mêm păng jang tơnăp, gơh hơgei păng pơcheh ‘lơ̆ng adoi gơh tơgop ăn teh đak kiơ̆ trong hơdrô̆ đơ̆ng kơdih; vang hơdai băl hơtŏk jơhngơ̆m pran grŭp tơgoăt tơgoăl đĭ đăng hơdrĕch hơdrŭng păng dôm kơjă kăp gĭt ‘lơ̆ng hơiă đơ̆ng joh ayŏ, kon bơngai Việt Nam, pơm jing jơhngơ̆m pran tih tên, hơnhăk teh đak bơ̆n roi ‘năr roi hơtŏk tơiung, hơnŭk hơnoa, hiôk hian.