Đơ̆ng rŏng jê̆ 1 khei vang hŏk lăm pơhrăm glơi ưh huach jên đei pơih tơ̆ xah, lơ hŏk tro tơ̆ 2 xah Cư Mgar păng Quảng Hiệp, apŭng Cư Mgar, dêh char  Đăk Lăk hlôi gơh glơi păng băt tôm tơdrong hơmet mưh đei glơ̆k tơ̆ đak. Oh H’Niêm Niê, tơ̆ pơlei Kna B, xah Cư Mgar, apŭng Cư Mgar tơroi: Inh păng đe boăl ưh kơ băt glơi păng nhôn ‘meh pơhrăm glơi vă kơchăng găn đak krong đak glung ‘noh hoai kơ glơ̆k. Lăm hŏk âu tơgŭm ăn nhôn gơh glơi păng băt chă tang găn lôch glơ̆k tơ̆ đak.

Oh Phan Hoàng Quý Phước, tơ̆ xah Quảng Hiệp, apŭng Cư Mgar tơroi: Unh hnam inh tơ̆ ataih noh vă năm pơhrăm glơi tơ̆ anih ưh đei ƀônh. Đe met ma pơtruh dơnâu glơi tơ̆ âu, gơnơm noh mă inh băt glơi păng pă đei hli kơ đak nhen adrol ki bơih.

Dôm lăm pơhrăm glơi ưh iŏk jên tơ̆ 2 xah Cư Mgar păng Quảng Hiệp hăm hơnăn “dơnâu glơi yi đŏng truh pơlei” jing tơdrong jang kơyuơ kâu lak ƀô̆ Kơyươ đe hơ-ioh ‘mêm kơ-eng apŭng Cư Mgar jang atŭm hăm dôm anih jang ‘mêm bơnat pơgơ̆r lơ̆m pơyan he sơnăm âu. Tơdrong jang âu hlôi iŏk đei tơdrong tơgŭm, vang jang đơ̆ng lơ thâi duch pơtho păng kon pơlei tơ̆ tơring. ‘Nhŏng Hà Mạnh Tuấn, thâi pơtho tơ̆ hnam trưng THCS Ngô Mây, xah Ea Mdroh tơroi: Jang atŭm hăm thâi Chuyền pơtho glơi ăn đe mon lơ̆m khei he vă đe mon tơ̆ tơring gơh đei pơhrăm ưh huach jên.

Yă Hồ Thị Nhâm tơ̆ xah Cư Mgar, apŭng Cư Mgar, Đăk Lăk tơroi tơdrong chơt hơ-iă ƀơ̆t vang tơgŭm đe mon gơh pơhrăm glơi: Inh tơgŭm cham, tơgŭm jên unh hơyuh ăn đe mon gơh đei anih pơhrăm glơi, ƀôh tơgŭm đei kiơ noh inh tơgŭm ăn.

‘Nhŏng Mai Văn Chuyền, pơtho tơ̆ hnam trưng THCS Ngô Mây, Pơgơ̆r Kâu lak ƀô̆ Kơyuơ đe hơ-ioh ‘mêm kơ-eng apŭng  Cư Mgar ăn tơbăt, pơngơ̆t hăm tơdrong đei lơ hơ-ioh tơ̆ tơring ataih yaih glơ̆k kơ đak, lơ̆m 3 sơnăm kơ âu, kâu lak ƀô̆ hlôi hăt hot hơvơn jơnŭm tơpôl, rim anih jang ‘mêm bơnat atŭm vang jang asong jên vă pơjing dơnâu glơi yi đŏng păng pơih lăm pơtho glơi ưh iŏk jên truh dôm xah hloi. Truh dang ei, kâu lak ƀô̆ hlôi hơmet đei 3 dơnâu glơi tơ̆ 2 apŭng Cư Mgar păng Krông Bông. Lơ̆m khei he, dơnâu glơi yi đŏng pơlơh băl năm truh dôm xah vă pơih lăm pơtho glơi ăn đe hơ-ioh. Lơ̆m 3 sơnăm kơ âu, đei jê̆ 600 ‘nu oh đei hŏk mă ưh kơ huach vă minh hlak jên lơ̆m khei he.

Atŭm hăm noh, mơ̆t sơnăm hŏk, kâu lak ƀô̆ jang atŭm hăm dôm hnam trưng pơih lăm pơtho ăn hŏk tro băt gah trong tang găn glơ̆k tơ̆ đak. Adoi kiơ̆ kơ ‘nhŏng Mai Văn Chuyền, dang ei kâu lak ƀô̆ tŏk bŏk pơih să truh lơ bơngai păng lơ tơring, tơguăt chă pơhrrăm ăn thâi, duch pơtho, bơngai jang pơgơ̆r đô̆i tơ̆ dôm hnam trưng hŏk vă kơchăng hloh lơ̆m tơdrong pơtho ăn đe hŏk tro. Atŭm hăm noh, kâu lak ƀô̆ pơtoi akŏm rim tơdrong vă asong dơnâu glơi, tơmam drăm glơi, pơtho glơi tơ̆ hnam trưng hŏk: Adoi ‘meh vă tơgŭm đe oh băt tôm tơdrong vă tang găn glơ̆k tơ̆ đak. Inh adoi hơpơi ‘meh, lơ̆m khei năr truh, jơnŭm pơgơ̆r tơring, jơnŭm jang tơpôl, đe mĕ ƀă hŏk tro gô tơrĕk hloh truh tơdrong tang găn đei sar bar glơ̆k tơ̆ đak ăn đe hơ-ioh, păng hơpơi ‘meh gô đei lơ hloh dơ̆ng tơdrong tơgŭm đơ̆ng dôm anih jang mŭk drăm, dôm anih jang ‘mêm bơnat, mă kăl noh dôm jơnŭm jang tơpôl tơ̆ tơring vă pơih lăm pơhrăm glơi ăn đe hơ-ioh tơ̆ dôm tơring ataih yaih.

Dêh char Đăk Lăk tơlĕch tơchơ̆t truh sơnăm 2025 tôm đe hơ-ioh lơ̆m sơnăm hŏk jăl kơđeh, trung học cơ sở đei pơhrăm păng băt tôm gah sar bar glơ̆k tơ̆ đak; 50% băt dôm tơdrong vei sơđơ̆ng lơ̆m đak. Vă đei jơnei âu, tơdrong tơgŭm jơhngơ̆m đơ̆ng tơ-‘ngla jang, anih jang ‘mêm bơnat vang pơih lăm pơtho glơi jing tơdrong kăl hloh. Mă kăl hăm dôm tơring ataih yaih, tơring tơnap tap, dôm lăm pơtho ưh iŏk jên gô tơgŭm ăn đe oh lơ tơdrong hiôk, hlôh vao vă tang găn lôch glơ̆k tơ̆ đak.