Hnam trưng jăl mônh Cư M’lan, apŭng sơlam Ea Súp đei hlŏh 600 ‘nu hŏk tro oei hŏk đơ̆ng lăm 1 truh lăm 5. Lơ̆m kơsô̆ âu đei hlŏh 140 ‘nu ŏh oei xa kơ tă tơ̆ hnam trưng kŭm hăm văjê̆ 40 ‘nu hŏk tro nai kơ 1 hnam trưng lơ̆m xăh. Yă Trần Thị Thủy – Kô hiê̆u trơng vei lăng Hnam trưng ăn tơbăt, đĭ đăng hŏk tro oei tơ̆ hnam trưng đei tơgŭm 1 păh jên sŏng xa ‘năr dơ̆ng păng sŏng xa kơmăng. Jên tơgŭm ‘nŏh 8.500 hlak 1 ‘nu 1 ‘măng sŏng xa. Tơdrong tơgŭm jên sŏng xa 2 vât âu tơgŭm ăn mĕ ƀă hŏk tro da ƀiơ̆ pơmat tat mưh chă kon jên rong kon, tơgŭm ăn hnam trưng vei kơjăp hnam gŏ pơvih pơvăn ăn hŏk tro, đe ŏh kŭm đei tôm tơmam sŏng xa ‘lơ̆ng vă tĭih vơ̆ păng hŏk pơhrăm.

Yă Trần Thị Thủy tơroi: “3 sơnăm ‘nâu grŭp jang tơgŭm vei kơjăp păng hơnơ̆ng tơgŭm ăn đe ŏh oei tơ̆ hnam trưng đei tôm tơmam sŏng xa ‘lơ̆ng, kŭm hăm hnam trưng vang tơgŭm vă đe ŏh đei tơdrong arih xa ‘lơ̆ng ƀiơ̆ mưh oei xa đunh tơ̆ hnam trưng. Tơdăh ưh đei đe sư tơgŭm, tơtă mơ̆ng đơ̆ng hnam trưng ngăl lei tôch pơmat tat. Hnam trưng hơpơi ‘mĕh dôm bơngai đei jơhngâm đon ‘lơ̆ng hơnơ̆ng yak hơdoi vang tơgŭm tơmam sŏng xa ăn đe ŏh hŏk tro.”

Hrei ‘nâu tơmam drăm, lăm hŏk tơ̆ dôm hnam trưng lơ̆m apŭng sơlam Ea Súp, dêh char Đắk Lắk đei răt, man hơmet kơjăp ‘lơ̆ng, hăm tôm tơmam vă pơtho păng hŏk. Mă lei yoa tơring xă, trong chông ba kon hơ ‘lơ̆p năm hŏk pơmat tat kơna lơ mĕ ƀă đa chă thuê hnam oei jŭm dăr hnam trưng. Oh Phùng Trung Hiếu, hŏk tro lăm 2 Hnam trưng jăl mônh Cư M’lan tơroi, Hnam hơtăih kơ Hnam trưng vă jê̆ 20 km, mĕ ƀă athei thuê anih tep hơdai hăm lơ hŏk tro nai. Tơdrong sŏng xa, oei xa tơƀâp lơ pơmat tat, ưh kơ rơhău kiơ. Đơ̆ng đei mât oei xa tơ̆ hnam trưng păng iŏk đei jên tơgŭm sŏng xa, tơdrong oei xa păng hŏk pơhrăm hiôk ƀiơ̆ bơih: “Adrol ki inh tep tơ̆ hnam đe jê̆ hnam trưng, athei sŏng xa hơdai, lơ bơngai sŏng hrĕnh kơ na inh sŏng ưh kơ phĭ. Mă lei dang ei mât sŏng xa hơdai tơ̆ âu, inh sŏng lơ ƀiơ̆, đei tôm ‘nhĕm ‘nhot ƀiơ̆.”

Kiơ̆ ‘nhŏng Đặng Quốc Vương – Bí thư đoan apŭng Ea Súp, tơdrong arih xa kơ kon pơlei kon kông tơ̆ apŭng Ea Súp oei tôch pơmat tat, mă loi hăm đe ŏh hŏk tro. Đơ̆ng tŏk bŏk sơnăm 2018, Anih jang đoan apŭng jang hơdoi hăm Anih jang tơgŭm kơ tĕh đak păng 1,2 ‘nu bơngai đei jơhngâm đon ‘lơ̆ng lơ̆m păng ‘ngoăih kơ dêh char Đắk Lắk vang tơgŭm jên sŏng xa tơ̆ hnam trưng, oei kơtă tơ̆ hnam hŏk ăn lơ hŏk tro tơnuh tơ̆ tơring sơlam; man anih oei xa hăm kơsô̆ jên văjê̆ 800 triu hlak jên vă đe ŏh đei anih tep pơdơ̆h, sơđơ̆ng jơhngâm hŏk pơhrăm.

Anih jang đoan apŭng oei hơnơ̆ng krao hơvơn dôm bơngai đei jơhngâm đon ‘lơ̆ng tơ̆ jơ̆p tơring lơ̆m tĕh đak vei kơjăp tơdrong jang ‘nâu vă roi đunh roi đei lơ hŏk tro tơnuh tơ̆ tơring sơlam đei xa yoa tơdrong tơgŭm ‘nâu: “Tơdrong jang “Vei rong hơioh” đĭ mât lơ̆m sơnăm mă 3 bơih. Kiơ̆ đơ̆ng tơdrong jang, đe ŏh đei tơdrong ‘lơ̆ng vă oei xa, sŏng xa ‘lơ̆ng ƀiơ̆ tơ̆ hnam trưng. Mưh đei tơdrong arih sơđơ̆ng, đe ŏh hŏk pơhrăm kŭm roi gơ̆h, vang jang lơ̆m dôm tơdrong tơ̆ hnam trưng kŭm hiôk hian ƀiơ̆, ƀônh ƀiơ̆. Nhôn hơpơi ‘mĕh rim khul grŭp, lơ bơngai hơnơ̆ng yak hơdoi vă tơdrong jang ‘nâu gơ̆h pơdui đunh, roi đunh roi đei lơ hŏk tro tơnuh tơ̆ tơring sơlam đei xa yoa, gơ̆h năm hŏk pơhrăm.”