Đei băt ƀok Nguyễn Phú Trọng, Tổng Bí thư Khul kơdră chĕp kơ̆l Trung ương Đảng Cộng sản Việt Nam lôch, Khul kơdră chĕp kơ̆l Trung ương Đảng Kon pơlei kăch mang Lào, Quốc hội teh đak Cộng hòa Dân chủ Nhân dân Lào, Kơdră teh đak Cộng hòa Dân chủ Nhân dân Lào, Khul kơdră teh đak Cộng hòa Dân chủ Nhân dân Lào, Anih Trung ương Mặt trận Lào tơiung pơjing teh đak păng Kon pơlei Lào; Khul kơdră chĕp kơ̆l Trung ương Đảng Cộng sản Trung Quốc păng kon pơlei Trung Quốc; Kơdră chĕp kơ̆l Đảng Kon pơlei Campuchia Hun Sen, Thủ tướng teh đak Campuchia Hun Manet, Kơdră Quốc hội Campuchia Khuon Sodary; Đại tướng Raúl Castro Ruz, Bí thư mă mônh Khul kơdră chĕp kơ̆l Trung ương Đảng Cộng sản Cuba, Kơdră teh đak Cộng hòa Cuba Miguel Díaz Canel-Bermúdez; Kơdră tơm teh đak Nga Vladimir Putin, Kơdră chĕp kơ̆l Thượng viện teh đak Nga, Valentina Matvienko, Kơdră Đu-ma teh đak Nga (vă akhan Hạ viện Nga) Vyacheslav Volodin hlôi pơtruh nơ̆r/kơthơ sơ ‘ngon hăm Khul kơdră chĕp kơ̆l Trung ương Đảng Cộng sản Việt Nam, Quốc hội teh đak Cộng hòa xã hội chủ nghĩa Việt Nam, Kơdră teh đak Cộng hòa xã hội chủ nghĩa Việt Nam, Khul kơdră teh đak Cộng hòa xã hội chủ nghĩa Việt Nam, Anih Trung ương Mặt trận Tổ quốc Việt Nam păng kon pơlei Việt Nam. Dôm kơthơ chih nơ̆r sơ ‘ngon, tơƀôh jơhngâm đon ‘mêm kơ ang tôch pơnĕh mưh kơtơ̆ng ƀok Nguyễn Phú Trọng, Tổng Bí thư Khul kơdră chĕp kơ̆l Trung ương Đảng Cộng sản Việt Nam lôch lơ̆m ‘năr 19 khei 7 sơnăm 2024.

Dôm kơthơ, nơ̆r sơ ‘ngon chih hơdăh: Ƀok Nguyễn Phú Trọng lôch hơchăng, Đảng, teh đak păng kon pơlei Việt Nam hiong lê̆ 1 ‘nu Kơdră chĕp kơ̆l kăch mang gơ̆h hơgei, tơpăt ‘lơ̆ng. Prăt jơhnơr arih bơ̆ jang kăch mang đơ̆ng kơdih, ƀok hlôi plang đĭ jơhngâm pran, đon rơgei đơ̆ng kơdih ăn dôm tơdrong jang gĭt kăl lơ̆m tơdrong tơblăh iŏk rơngei hơdrĕch hơdrung, pơjing đei 1 teh đak kơjăp ‘lơ̆ng păng tơdrong jang tơplih ‘nao đơ̆ng Đảng Cộng sản Việt Nam, mă loi jĭ tơdrong tơiung pơjing, hơmet ming Đảng pran kơjăp, rơgŏh ‘lơ̆ng, kŭm nhen tơdrong jang tang găn xa pơjĭp, pơm glăi, hơnhăk teh đak Việt Nam yak tŏk hơnơ̆ng, anih dơ̆ng đơ̆ng teh đak Việt Nam roi tŏk kơjung lơ̆m apŭng plenh teh păng tơ̆ tơring. Ƀok hlôi jing bơngai chĕp kơ̆l tôch gơ̆h hơei lơ̆m chăl hle.