Kiơ̆ nơ̆r tơroi đơ̆ng ƀok thây Lê Văn Lâm, thây pơtho tơ̆ hnam trưng THCS thĭ trơ̆n Đăk Hà, apŭng Đăk Hà, dêh char Kon Tum, ‘năr 5/10 âu ki 1 grŭp bơngai hơlĕnh akhan kăn ƀô̆ dăr hơlen tơdrong yoch Công an dêh char Kon Tum păng Anih tơm Công an krao điên thoăi akhan thây đei ƀơm truh 1 tơdrong tĕch mơdro ma tŭy tih. Vă huei ƀơm truh tơ̆ bơngai lơ̆m hnam kŭm nhen tơblang tơƀôh kơdih kâu ưh đei yoch, hăm nơ̆r tơhli đơ̆ng khul âu, thây Lâm tŏk iŏk truh 1 ti 100 triu hlak jên gơih ăn 1 tai khoan đang kơ ‘nŏh đe iŏk pơđĭ jên ‘nâu hloi.

Ƀok thây Nguyễn Văn Hiền, Hiê̆u trơng Hnam trưng THCS thĭ trơ̆n Đăk Hà anih thây Lê Văn Lâm oei bơ̆ jang tơroi: “Mưh thây Lâm roi tơbăt, inh jĭ Hiê̆u trơng hnam trưng inh đei hloi nơ̆r athei thây Lâm jăh năm tơroi ăn Công an apŭng. Oei kơdih kâu inh ‘nŏh tơroi ăn Anih chĕp kơ̆l Đảng, Anih vei lăng kon pơlei. Pơgê ‘nâu thây Lâm năm tơ̆ Công an dêh char”.

Kŭm hăm thây Lê Văn Lâm, tơ̆ thĭ trơ̆n Đăk Hà, apŭng Đăk Hà, kô Hồ Thị Thu Sương, pơtho tơ̆ Hnam trưng THPT Trần Quốc Tuấn kŭm put kiơ̆ nơ̆r lu bơngai hơlĕnh lơ̆m mang, hiong 270 triu ‘năi.

Hla ar chih tơroi đơ̆ng kô Sương ăn ƀôh, ‘năr 9/10 âu ki, kô chih măt vang chă rơih bơngai hơri hiôk. Kiơ̆ nơ̆r athei, kơsô̆ jên athei nôp roi đunh roi tŏk, klĕp truh 100 triu hlak jên. Mă hơtuch lu bơngai hơlĕnh athei kô nôp 220 triu ‘mơ̆i mă gơ̆h iŏk pơdreu dơ̆ng kơsô̆ jên 100 triu mă sư nôp adrol kơ ‘nŏh. Ƀât mă tơdrong arih xa kơ unh oei pơmat tat, đei dơ̆ng tơdrong sơ ‘ngon kơna kô Hồ Thị Thu Sương chă tŏk iŏk 170 triu vă nôp kiơ̆ nơ̆r đe athei, nôp đang ƀôh kơdih kâu puh ƀơm nơ̆r đe hơlĕnh.

Đe thây kô tơ̆ apŭng Đăk Hà, dêh char Kon Tum puh ƀơm nơ̆r lu bơngai hơlĕnh ưh lăp hiong răm lơ găh mŭk drăm kơdih kâu đĕch mă oei pơm ăn anih mă đe sư oei pơtho tơvŏk dơ̆ng lơ tơdrong. Thây Mai Xuân Kiên, Hiê̆u trơng Hnam trưng THPT Trần Quốc Tuấn, ăn tơbăt: “Đơ̆ng kô đei tơdrong thoi nŏh, hnam trưng athei Khul Công đoàn hnam trưng hơnơ̆ng vei lăng kô, jô̆ hloi tơ̆ kơmăng vă pơlung kô, vă kô huei đei tơdrong nai dơ̆ng. Roi tơƀôh ăn kô chă pơma nuh hăm dôm anih jang kơpal păng hnam trưng hơnơ̆ng pơlung kô vă pơm ăn kô gơ̆h sơđơ̆ng jơhngâm”.

Găh tơdrong tơm pơm ăn lơ thây kô tơ̆ apŭng put kiơ̆ nơ̆r lu bơngai hơlĕnh lơ̆m mang, yă Lê Thị Nhung, Kơdră Anih vei lăng pơtho pơhrăm apŭng Đăk Hà, dêh char Kon Tum, akhan đei lơ tơdrong: “Mă đơ̆ng hơnơ̆ng đei nơ̆r tơtă đơ̆ng anih jang kơpal, mă loi jĭ đơ̆ng công an. Mă lei oei đei thây kô lui, pŭh kiơ̆ nơ̆r lu bơngai hơlĕnh. Rŏ năng đe thây kô tam mă băt dôm bơngai ‘nŏh hơlĕnh pơdăr? Mă 2 dơ̆ng, rŏ năng đe thây kô oei kăl 1 kơsô̆ jên kiơ ‘nŏh vă pơ ‘nhŏ ăn kơdih kâu dăh mă unh hnam kơna pơm kiơ̆ tơdrong ‘nŏh. Mă 3 ‘nŏh, lơ̆m tơdrong hơlĕnh pơdăr đe thây kô ngĕh kơdih kâu đei tơdrong ‘nŏh tơpă kơna pơm kiơ̆ nơ̆r đe đang kơ ‘nŏh gơih jên”.