Pơgê 16/5, tơ̆ Quảng Bình, Trung ương Đoàn hơdruh tơdăm cộng sản Hồ Chí Minh păng Khŭl hơdruh tơdăm xŭng phŏng sơ̆ Việt Nam pơgơ̆r Pơdă tơƀôh um rup, hla ar jơhnơr arih hơnăn “ Chhôk hơiă Trường Sơn”. Vang truh akŏm pơdă đei lơ lap lĭnh so, hơdruh tơdăm xŭng phŏng so, kang ƀô̆ Khŭl hơdruh tơdăm dôm dêh char Nghệ An, Hà Tĩnh, Quảng Bình, Quảng Trị, Thừa Thiên Huế, Quảng Nam, Đắk Lắk, Gia Lai, Kon Tum, Đắk Nông păng Bình Phước. 

Pơdă tơƀôh 200 hlak rup, hla ar chih răk gĭt kăl tơƀôh dơ̆ng lơ, tơpă tơdrong tơblăh mơmat tat, kơtang tơ̆ trong Trường Sơn; tơƀôh tơdrong jơnei đơ̆ng khŭl lĭnh hơdruh tơdăm xŭng phŏng chăl ‘nao.

Tơ̆ Gia Lai, pơgê 16/5, Khul Ƀô đô̆i Trường Sơn pơlei tơm Pleiku, dêh char Gia Lai pơm lêh tơbăt 65 sơnăm Năr pơjing ƀô đô̆i Trường Sơn. Tơ̆ jơ tơƀâp, dôm bơngai tang măt chă pơđou dơ̆ng dôm tơdrong juăt kơtang nuih mơng đơ̆ng Ƀô đô̆i Trường Sơn. Trong Trường Sơn – trong Hồ Chí Minh tôch gĭt kăl vă tơgŭm găh bơngai, tơmam đơ̆ng lơ tơring ăn tơdrong tơblăh hơyăt Mi dŏng teh đak, tơblăh iŏk rơngei tơring pơbăh, pơjing đei 1 teh đak kơjăp ‘lơ̆ng.

Hrei ‘nâu, trong Hồ Chí Minh jĭ 1 lơ̆m dôm trong gre tơm năm klĕch 28 dêh char, pơlei tơm, lơ̆m nŏh đei pơleitơm Pleiku, dêh char Gia Lai, tơgop ăn tơdrong jang atŏk tơiung mŭk drăm, tơpôl tơ̆ tơring. Khul ƀô đô̆i Trường Sơn pơlei tơm Pleiku dang ei đei 87 ‘nu bơngai, mă lơ jĭ đe linh rơka, jĭ jăn, bơngai ƀơm pơgang dioxin. Mă đơ̆ng đĭ kră pă jăng ngăl bơih ră mă lei đe linh Ƀô đô̆i Hồ oei adrin bơ̆ jang, atŏk tơiung mŭk drăm unh hnam.