Tơdrong pôk bơnê, akŏm pơma dơnuh hăm đe linh jĭ rơka hlăm lơ̆m jâ̆p teh đak đei hơnăn “Pla unh đơ̆ng plei nuih”, đei tơdrong vang akŏm đơ̆ng 100 'nu tang măt ăn đe linh jĭ rơka ăl, 50 kăn ƀô̆, đe ƀak sih truh đơ̆ng 14 anih rong 'me, hơmet jĭ ăn đe linh Jĭ rơka lơ̆m jâ̆p teh đak păng vă jê̆ 600 hơdruh tơdăm, sinh viên lơ̆m jâ̆p tơring kơ anih tơm Hà Nội. Rim bơngai tang măt đei tơmơ̆ng đe linh jĭ rơka akŏm pơma dơnuh gah dôm tơdrong plang, tơdrong hiong răm păng tơdrong đei jơnei đơ̆ng đe linh jĭ rơka hlôi păng tŏk bŏk oei găn ga.

Kiơ̆ nơ̆r đe sư tơroi, tơdrong hơrih iung tơjră, dôm tơdrong plang păng dôm tơdrong hiong răm, rơka hơbur nhen đei vih tơbang ăn rim bơngai mơ̆ng lăng băt, mă kăl noh đe sinh viên ƀôh đei tơdrong iung tơjră nuih mơng adoi nhen tơdrong plang jơhngơ̆m đơ̆ng đe linh jĭ rơka pơma hơdrô̆ păng hnưr mih ma yă ƀok yak hơdrol. Oh Lê Thảo Đan, sinh viên Hnam trưng Đăi hŏk Kinh tế Kuôk dân tơroi: “Ah đei năm năm truh tơdrong akŏm âu, đei tơmơ̆ng đe mih linh jĭ rơka tơroi kơ khei năr iung tơjră nuih mơng, inh băt hơdah tơdrong plang tih tên đơ̆ng đe mih ma, plang sơnăm mơlôh po vă kơ nhôn hrei âu gơh đei khei năr jơnap nhen dang ei. Kơdih po inh hơdrin pơhrăm vă tơgop pơm ăn teh đak hơtŏk tơ-iung hloh, tơgăl hăm dôm tơdrong plang đơ̆ng jơhnơr mih ma duch nă sơ̆ ”.

         Lăng truh tơbăt 69 sơnăm Năr rơngei Hơnih tơm. Khul drŏ kăn pơlei tơm Hà Nội hlôi pơgơ̆r năr lêh “Drŏ kăn Hơnih tơm pơjing tơdrong jang tơchăr” sơnăm 2023. Năr lêh ‘nŏh jing jơ ‘năr vă hơlêm jơhngơ̆m đon tơ iung pơjing tơdrong jang păng tơplih ‘nao tơchăr kơ đe drŏ kăn pơlei tơm Hà Nội, pơjing rơvơn ăn rim bơngai chĕp pơgơ̆r, hơnih mơdro sa păng rim khul jang tơgŭm djru pơjing tơdrong jang chă tơƀơ̆p, pơma dơnuh, tơbăt dih băl trong jang hơ iă, hŏk pơhrăm păng tơgoăt, jang hơdoi atŏk tơ iung.

Khul drŏ kăn pơlei tơm Hà Nội hlôi pôk pơ ư 10 trong tơchăr, tơmam drăm ‘lơ̆ng. jei tơ̆ jơ ‘năr lêh au, rim pơmai oh hlôi pơjing đei ‘nhĕm ‘nhot sa đơ̆ng tơmam drăm kơ tơring. Mŏ Phạm Thị Tư Hậu, Tơ-‘ngla hơnih pơm tơlĕch tơmam drăm Yến Anh Food tơbăt: “Ba Vì pơlei nhôn ‘nŏh tơring đei groi teh kông să rim bơngai chă pơtăm lơ ƀum ƀlang mă lei tĕch mơdro ưh kơ hlot. Tĕch ăn dôm bơngai mơdro ‘nŏh hơnơ̆ng pơkep kơjă kơna ĭnh hlôi tơchăr pơjing đei 10 tơmam sa đei ƀơm truh ƀum ƀlang nhen: Ƀĕng ƀum ƀlang phang hrau hăm đak gao, ƀĕng ƀum ƀlang phang phomai, ƀĕng ƀum ƀlang phang sầu riêng, ƀum ƀlang hơtŭk hăm hla tơyông, ƀum ƀlang hrau chehphe ... dang ei hơnih au hlôi tĕch ăn rim hơnih lơ̆m teh đak păng mĭnh ƀar teh đak boăl nhen Lào, Campuchia”.

 – Kơ kuh kơ 'măng tơbăt 69 sơnăm Năr đei Jơnei Anih tơm, tơ̆ Hà Nội hlôi pơgơ̆r Pơdah Mih thuơ̆t hăm hơnăn Tơchơ̆t, sơnong jang, tơdrong pơm jang, gơh hơgei, hơtŏk tơ-iung”. Pơdah sơnăm âu đei 260 tak phẩm đei bieh lơ̆m dôm tơmam: Bieh pik đak kơ-ang păng chrah um, đei Jơnŭm ngê̆ thuơ̆t rơih đơ̆ng hloh 365 tak phẩm kơ dôm bơngai bieh chhơ̆. Lơ̆m noh, đei 229 tak phâm bieh chhơ̆ păng 31 tak phẩm um chrah.

Kiơ̆ sơkơ̆t đơ̆ng dôm bơngai juăt bieh chhơ̆, tơdrong kăp gĭt kơ 'măng pơdah mih thuơ̆t Anih tơm sơnăm âu noh tơdrong juăt hơgei roi năr roi kơjung hloh. Noh jing gah trong tơbang tak phâm  tơnăp păng 'lơ̆ng đơ̆ng bơngai bieh chhơ̆. Pơdah pơih trong akŏm hŏk hơlen ăn dôm bơngai bieh chhơ̆. 'Nâu adoi jing 'măng vă dôm bơngai bieh chhơ̆ tơ̆ Anih tơm atŭm tơguăt, yak kiơ̆ hơtŏk tơ-iung kơjăp gah mih thuơ̆t Anih tơm lơ̆m khei năr kơnh. Bơngai chrah um Nguyễn Xuân Thủy – Kơdră Jơnŭm Mih thuơ̆t Hà Nội ăn tơbăt: “Pơdah âu 'noh kăp gĭt hơ-'nguơ̆u kơ bơngai Hà Nội, um rŭp păng joh ayŏ Hà Nội. Kiơ̆ đơ̆ng pơdah âu, đe ngê̆ sih 'meh pơtruh hăm bơngai băt 'mêm kơ ngê̆ thuơ̆t Anih tơm tơdrong kăl noh Ngê̆ thuơ̆t Hà Nội hơnơ̆ng hơtŏk tơ-iung, dôm tơdrong akŏm hơnơ̆ng đei hơlêm adoi nhen đei iŏk yua păng hơtŏk dôm tơdrong juăt jue 'lơ̆ng rŏ kơ bơngai Hà Nội, tơdrong juăt jue pơjing păng vei lăng Anih tơm adoi nhen joh ayŏ bơngai Hà Nội pơma atŭm.