Hơnơ̆ng ‘măng hop akŏm mă 6, Jơnŭm pơgơ̆r kon pơlei dêh char Dak Nông jăl IV ‘năr brei (6/7) pơma dơnuh tơdrong hơtŏk tơiung mŭk drăm, tơpôl. Kơdră Anih vei lăng kon pơlei dêh char Dak Nông Hồ Văn Mười tơl nơ̆r apĭnh 1,2 tơdrong bơngai tăh hla păng bơngai tang măt Jơnŭm pơgơ̆r kon pơlei dêh char bơngơ̆t truh, mă loi ‘noh jĭ lăng kăl lơ̆m tơdrong jang chĕng hơmet bô xít, teh. Tơ̆l nơ̆r bơngai tăh hla păng bơngai tang măt Jơnŭm pơgơ̆r kon pơlei dêh char Dak Nông, ƀok Hồ Văn Mười tơ roi đei 7 tơdrong tơm, kăl kơ lăng truh lơ̆m hơtŏk tơiung mŭk drăm tơ pôl kơ dêh char 6 khei âu ki păng tơ̆ hơnăp kơnh.

 Lơ̆m noh, tơdrong bô xít hlôi đei lơ bơngai tang măt Jơnŭm pơgơ̆r kon pơlei dêh char tơ roi tơ̆ ‘măng hop akŏm. Kơdră Anih vei lăng kon pơlei dêh char Dak Nông tơbăt, kiơ̆ hơlen lăng ‘nao hloh, kơ sô̆ bô xít kơ Dak Nông đei 60% lơ̆m teh đak, ‘noh jĭ tơdrong đei yua ‘lơ̆ng kơ dêh char. Mă lei tơdrong dang ei ‘noh tŏk bŏk tôch kơ mơmat, tôch kơ tơ hlăk. Ding truh dang ei oei tam mă đei hơmet ming kơ na 1062 tơdrong jang kơ dêh char đei hơdrom băl hăm chĕng hơmet teh jang bô xít, lơ̆m hơgăt teh tŏk truh vă jê̆ 6.700hek tar. Tơdrong ‘nâu hơnhăk truh vă đĭ đăng dôm tơdrong tơlĕch trong jang tơmơ̆t jên jang lơ̆m dêh char Dak Nông athei pơdơh lê̆ ‘mơ̆i, ƀơm ưh kơ ‘lơ̆ng truh tơdrong sơng tơmơ̆t jên jang.

‘Năr (6/7), lơ̆m jơ apinh jet mă blŭng kơ Hop akŏm mă 13, jăl XII, đơ̆ng 2021-2026 kơ Jơnŭm pơgơ̆r kon pơlei dêh char Gia Lai, dôm bơngai tang măt apinh hơlen găh dôm tơdrong tơtŏ lơ̆m tơdrong jang ming man tơ̆ tơring. Lơ̆m nŏh, tơdrong pơm hnam homestay, hnam tih ‘lơ̆ng glăi kơ luơ̆t păng ưh jăh hơmet pơ ‘lơ̆ng dôm tơdrong tơproh trong jang, chĕng hơmet tĕh tơ̆ dôm tơring lơ̆m dêh char, jing tơdrong oei găn trong jang tŏk păng tơlĕch jên jang ăn dôm tơdrong jang kăl.

Tơl nơ̆r apinh đơ̆ng bơngai tăh hla găh hơnăp jang đơ̆ng anih vei lăng mưh lê̆ lơ hnam homestay, anih pơdơ̆h ngôi, anih huch chĕh phe đei man glăi kơ luơ̆t, ƀok Nguyễn Bá Thạch- Kơdră vei lăng tơdrong ming man dêh char Gia Lai akhan, tơdrong vei lăng tĕh đak găh ming man tơ̆ lơ tơring lơ̆m dêh char oei tam mă kơjăp; gô anih jang, hnam đĭ man đang bơih ‘nŏh ‘nao băt, jing pơmat tat mưh sek tơlang; đon pơm kiơ̆ luơ̆t đơ̆ng kon pơlei tam mă ‘lơ̆ng, lơ bơngai băt mă lei pơrơ̆ng pơm glăi, pơm pơmat tat, pơdui đunh khei ‘năr sek tơlang, lê̆ hŏh hnam, anih jang đĭ man đang bơih, ưh trŏ luơ̆t ƀât dŏh.

Tơdrong tĕch mơdro teh, hnam nhen oei dơ̆ng ưh kơ đei tơ drŏ tơ drĕnh mă lei tŏk bŏk pơm tơ tŏ ‘Măng hop akŏm mă 5, Jơnŭm pơgơ̆r kon pơlei dêh char Kon Tum jăl XII. Lơ bơngai tang măt tơƀôh đon bơngơ̆t tơdrong ‘nâu gô ƀơm ưh kơ ‘lơ̆ng tih truh thu mong jên jang kơ tơ ring lơ̆m sơnăm ‘nâu. 6 khei blŭng sơnăm, thu iŏk đơ̆ng jên iŏk yua teh kơ dêh char  Kon Tum jô̆ pơ hlom bơ̆jang kiơ̆ đei 90 ti hlak jên, lăp đei 22,5% pơ ting hăm tơchĕng jô̆ hơdrol.

Tơ̆ ‘măng pơma dơnuh, bơngai tang măt Jơnŭm pơgơ̆r kon pơlei dêh char, Bí thư anih jang Đảng pơlei tơm Kon Tum Nguyễn Đức Tuy tơbăt, đơ̆ng dang ei truh hơtuch sơnăm ‘nâu rŏ lăng oei jing long nol, thu iŏk đơ̆ng tĕch mơdro teh, hnam oei rŏ lăng oei tơ jur ‘mơ̆i. Vă hơmet pơ ‘lơ̆ng tơhlăk tơ hlĭn ăn tơdrong tĕch mơ dro teh, hnam oei pơvei thu iŏk jên jang teh đak, pơm tơdrong ‘lơ̆ng ăn dôm anih jang ƀơm truh, tơgop nơ̆r đơ̆ng lơ bơngai tang măt Jơnŭm pơgơ̆r kon pơlei dêh char Kon Tum akhan, kăl kơ hơmet ming kơ jă tơtom kiơ̆ tơ plih anih tĕch mơdro; tơtom, jang kơ jăp lơ̆m tơdrong jang chĕng hơmet, hơmet pơ ‘lơ̆ng đei tơdrong tơ hlăk tơ hlĭn lơ̆m pơm kiơ̆ khôi luơ̆t găh teh.