Pơgê năr 5/6, pơma ah Lêh pơtơm, kơdră dêh char Kon Tum ră hơdah tơdrong kăp gĭt kơ “Têt pơtăm ‘long ling lang ƀlŏk bơnê kơ Ƀok Hô” lơ̆m tơdrong vei lăng cham char păng đei jơnei kơjăp mă ‘long jơk pơyua ăn tơdrong hơrih; atŭm hăm noh hơvơn kon pơlei hăt hot pơtăm ‘long rah rai păng ‘long pơjing bri, tơgop hơmet teh phui phang, tơjră hăm tŏ phang pơđang nhen hơnăn kơ Năr cham char apŭng plenh teh năr 5/6 sơnăm âu.

Đơ̆ng rŏng kơ lêh pơtơm, atŭm hăm pơtăm ‘long rah rai, dêh char Kon Tum tơlĕch pơtăm 3.000 hectar bri. Lơ̆m noh Anih jang vei lăng kon pơlei 10 apŭng, pơlei tơm kơ dêh char tơgŭm kon pơlei pơtăm jê̆ 2.800 hectar păng hloh 200ha kơyuơ dôm anih jang gah bri iŏk pơtăm.  

Pơgê năr 5/6, tơ̆ pơlei tơm Buôn Ma Thuột, dêh char Dak Lăk hlôi tơlĕch jang “Têt pơtăm ‘long ling lang ƀlŏk hơdơ̆r kơ Ƀok Hô”. ‘Nau jĭ tơdrong jang lăng truh tơbăt 120 sơnăm Năr pơjing dêh char Dak Lăk, tơgop lơ̆m jang kiơ̆ jơnei tơdrong jang “Pơtăm mĭnh ti dơnơm ‘long yơ̆p” kơ yuơ Khul kơdră teh đak tơlĕch ăn. Lơ̆m dôm sơnăm au ki, rim hơnih jang, tơring păng kon pơlei dêh char Dak Lăk hlôi jang kiơ̆, vang iung jang đĭ  tơdrong jang pơtăm ‘long, pơtăm bri păng vei lăng bri. Sơnăm 2023, lơ̆m dêh char hlôi pơtăm đei hloh 4.500 ha bri, jơnei 252% trong tơlĕch jang.

Tơ̆ pơlei tơm Buôn ma Thuột ‘noh mĭnh lơ̆m dôm hơnih kơdrơ̆m đei ‘long yơ̆p kơtang hlŏh lơ̆m teh đak. Tơ̆ pơm lêh tơlĕch jang Têt pơtăm ‘long pơgê năr 5/6, rim kơdră tang măt păng kon pơlei hlôi pơtăm kơhrĕng dơnơm ‘long tror ‘moi kiơ̆ hơlam trong Võ Nguyên Giáp. Lăp đơ̆ng rŏng pơm lêh tơlĕch jang, gô đei 5.000 dơnơm ‘long đei chă pơtăm tơ̆ rim tơring phương kơ pơlei tơm.