Vang năm đei 140 ‘nu bơngai lơ̆m 14 khul pơlong đơ̆ng rim apŭng păng thĭ xah Ƀuôn Hô. Rim khul vang pơlong 3 tơdrong ‘noh: apĭnh jet gia pơma dơnuh, pơm tông păng pơlong pơdjoong hơbĕn ao ‘lơ̆ng.

Hloh đơ̆ng pơlong, hăm hơmet tôch kơ brĕ rim khul hlôi tơbăt hơdăh găh khul kơdih, tơbăt lơ tơdrong băt hơdăh khôi luơ̆t găh hơtŏ hơnơ̆ng drŏ nglo drŏ kăn, tang găn hil hơreh teh hơvĕnh. Adoi pơlong pơdjoong hơbĕn ao ‘lơ̆ng kơ hơdrĕch hơdrung kơdih. Đei băt, lơ̆m khei năr ou ki, Khul drŏ kăn dêh char Dak Lăk hlôi pơjing đei 400 trong jang pơrô̆ tơbăt, tơgum djru băt hlôh ƀôh vao găh tơdrong hơtŏ hơnơ̆ng drŏ nglo drŏ kăn lơ̆m kon pơlei.