Ƀok K’Châu bơngai K’Ho (oei tơ̆ thôn 2, xăh Lộc Nam, apŭng Bảo Lâm, dêh char Lâm Đồng) tơbăt, ŭnh hnam sư đei hơnăn vă iŏk 25,5 hek tar bri ‘long tơ̆ tơƀôt bri 5, hơnih bri 491, păng yă Ka Phấn oei pôm pơ lei kŭm hlôi pơm hla ar păng đei hơnăn vă iŏk 16,5 hek tar tơ̆ hơnih 491. Mă lei tơpă yan âu pơđĭ 2 ‘nu ưh kơ đei 1 tơƀôt hơyơ: “Bri tơpôl ‘noh ĭnh đei hơnăn mă lei đe ưh kơ đei pơjao ăn. Ƀơ̆t hơdrol ki, ma K’Hân đei pơma akhan: Mon đei hơnăn lơ̆m pơjao teh pơjao bri. Ĭnh kĭ hla ar jang hơdai. Đang kơ ‘noh sư pơma: Kĭ vă kơ lăp đĕch, oei e gơh đơ̆ng yơ pơtăm bri. Pơjao teh pơjao bri mă ưh kơ băt tơ̆ hơnih hơyơ, ƀơ̆t yơ kŭm ưh kơ băt ngăl. Rŏ đei pơjao lei na băt!”

Kiơ̆ kơ hơnăn tơpôl grŭp ŭnh hnam iŏk bri đei Anih vei lăng găh choh jang sa hơtŏk tơiung tơring tơrang dêh char kĭ ăn ‘noh kơdră grŭp ‘noh jĭ ƀok K’Đản, oei tơ̆ thôn 1 păng 13 ŭnh hnam oei tơ̆ dôm thôn 2 păgg 4 kơ xăh Lộc Nam. Mă lei ưh kơ hlôh yua kơ kiơ Anih vei lăng kon pơlei apŭng Bảo Lâm ‘noh tơlĕch tơdrong tơchơ̆t pơjao bri ăn kơ ƀok Nguyễn Duy Minh, oei tơ̆ kơ sô̆ 29, trong Tô Hiệu, phường Lộc Sơn, pơlei tơm Bảo Lộc pơm bơngai tang măt. Păng grŭp tơpôl yua đơ̆ng ƀok Minh tang măt âu lăp đei 6 ŭnh hnam, mă ưh kơ sĭ 14 ŭnh hnam nhen ƀơ̆t pơjing trong jang. Akŏp hơgăt teh đei pơjao ‘noh 209 hek tar, lơ̆m noh đei bri ‘noh 93 hek tar, teh bri 'long ưh kơ đei bri ‘noh 116 hek tar. Vă đĭ đăng bơngai đei pơjao teh pơjao bri lơ̆m grup âu đei hla ar chih hơnăn oei sa tơ̆ hơnih nai, păng ưh kơ sĭ bơngai kon kông.

Bri păng teh bri ‘long tơ̆ âu ƀrư̆ ƀrư̆ jing pơgar ‘long kăp gĭt, ƀơ̆t lăp đei tĕch păng pơm hnam. Kiơ̆ kơ Anih vei lăng găh choh jang sa păng hơtŏk tơiung tơring tơrang Lâm Đồng, truh khei 9 sơnăm 2019, lơ̆m kơsô̆ 93 hek tar bri brăh hlôi pơjao ăn kơ tơpôl âu vei lăng, hlôi đei hiong pơgoh  73 hek tar. Ƀok Võ Thiên Bình, Kơdră Anih vei lăng kon pơlei xăh Lộc Nam pơma hơdăh tơdrong tơm pơm ăn bri đei phă, teh bri ‘long đei tơ gar iŏk ‘noh jĭ yua đơ̆ng pơjao ưh kơ ƀlep bơngai: “Tơdrong pơjao teh, pơjao bri ‘noh khei ‘năr âu ki lơ̆m xăh đei 1,2 tơdrong pơm glăi. Hrei ‘nâu anih jang kanh sat dăr hơlen tŏk bŏk pơm hơdăh tơdrong ‘nâu. Kơdră chĕp kơ̆l vei lăng lơ̆m tơdrong jang vei lăng bri kơ anih jang tơ ‘ngla bri oei lơ tơdrong ưh kơ ‘lơ̆ng, đei glăi. Đei tơdrong pơm glăi ‘noh pơjao ưh kơ ƀlep bơngai.”

‘Năr 8/7/2022, ƀok Lê Văn Ba oei tơ̆ thôn 4, xăh Lộc Phú chă ƀôh 1 grŭp 3 ‘nu bơngai ‘noh: Nguyễn Đức Dạo, Nguyễn Đức Chung păng Nguyễn Văn Dũng tŏk bŏk phă bri tơ̆ tơƀôt 6, hơnih bri 438A. Ƀok Ba đei grŭp âu teh dong, jĭ rơka 12%. Anih jang Dăr hơlen kon pơlei apŭng Bảo Lâm hlôi tơkêng 2 ‘nu yoch Nguyễn Đức Dạo păng Nguyễn Đức Chung găh tơdrong yoch “Pơrơ̆ng pơm ăn đe jĭ rơka”. Ƀok Lê Văn Ba tôch kơ blĕk yua kơ 3 ‘nu teh sư, mă lei lăp đei 2 ‘nu tơkêng yoch; pơm glăi phă pơrăm bri đơ̆ng grŭp âu ưh kơ đei anih jang kơpal tơroi truh hloi: “Iŏk yua tơdrong teh đak pơjao bri mă hlôi tĕch bri, phă bri, koh phă ‘long, tơmam drăm lơ̆m bri tôch kơ lơ. Ĭnh hlôi chă ƀôh pơm glăi, ĭnh hlôi tơ roi tơkêng. ‘Noh Kơdră apŭng Bảo Lâm, Nguyễn Trung Kiên tơlĕch tơdrong tơchơ̆t iŏk pơdreo pơđĭ hơgăt teh kơpal pơjao ăn kơ anih vei bri tang găn Đam B’ri vei lăng. Mă lei hrei ‘nâu, dôm tơdrong pơm glăi mă Anih vei lăng kon pơlei dêh char Lâm Đồng athei Anih vei lăng kon pơlei apŭng Bảo Lâm iŏk pơ dreo pơđĭ hơgăt teh kơpal, pơtăm dơ̆ng bri păng pơm hơdăh dôm bơngai pơm glăi vă sek phak kiơ̆ tơdrong hơgăt. Mă lei truh dang tơdrong ‘noh oei thơ thĕng hiơt hiong đĕch.”

Tơ̆ Lâm Đồng ‘nao lăp đei 8 tơpôl hlôi đei Anih vei lăng kon pơlei dôm apŭng pơjao teh bri hăm akŏp teh ‘noh 2.260 hek tar, mă lei truh dang ei hlôi iŏk pơdreo 5 tơpôl. Tơdrong kăl kơ tơroi ‘noh jĭ pơđĭ 3 tơpôl hăm 99 ŭnh hnam tơ̆ apŭng Bảo Lâm đei pơjao vă jê̆ 860 hek tar teh bri păng teh bri ‘long, tă kơ đei iŏk pơdreo ngăl. Ƀok Võ Danh Tuyên, phŏ Kơdră Anih vei lăng găh choh jang sa păng hơtŏk tơiung tơring tơrang Lâm Đồng tơpăt drơ̆ng akhan: “Tơ̆ Lâm Đồng đei tơdrong ‘noh jĭ pơjao bri ưh kơ ƀlep bơngai. Ƀơ̆t blŭng ƀơ̆t hơlen lăng, băt hơdăh ƀlep, mă lei đơ̆ng rŏng dôm ŭnh hnam ‘noh đe sư iŏk yua trong jang tơgŭm đang kơ ‘noh đe sư tĕch tơplih. ‘Noh teh bri ‘long đei tơ gar iŏk, bri đei phă. Ƀơ̆t nhôn  chă ƀôh ‘noh athei iŏk pơdreo, păng hlôi iŏk pơdreo 5 tơdrong jang tơpôl. Tơ̆ noh kŭm đei hơnăp jang vei lăng đơ̆ng kang ƀô̆ bri ‘long, tơ ‘ngla bri, bơngai jang vei lăng bri păng khŭl kơdră tơring kŭm mă kơtang lơ̆m tơdrong ‘nâu.”

Đei lơ ‘măng hop akŏm, lơ nơ̆r apĭnh, păng tơchơ̆t hlôi đei anih jang ƀơm truh păng Anih vei lăng kon pơlei dêh char Lâm Đồng tơlĕch ăn hăm tơdrong tơm: Athei Anih vei lăng kon pơlei dôm apŭng iŏk pơdreo dôm tơdrong tơchơ̆t pơjao teh pơjao bri ăn grŭp tơpôl. Mă lei lơ̆m yan âu, tơ̆ dôm tơring teh âu hlôi jing pơgar ‘long kăp gĭt, hnam pơm kơjăp ‘lơ̆ng. Bri đei pơjao 1 trong kư̆ kă kơna đei iŏk răh. Hơnăp jang âu ưh khan lăp tŭn lŭt ăn păh iŏk bri. Băt jê̆ rŏ lăng lăp iŏk pơdreo dơ̆ng dôm tơdrong tơchơ̆t pơjao bri ăn tơpôl ‘noh hơpuih ti pă đei ƀơm tơdrong kiơ?