Jĭ 1 lơ̆m dôm đảng viên đei iŏk kơ sơ̆p hla ar ‘mơ ‘met jên, ƀok Trần Thanh Tâm, Chi bộ phường Bình Tân, Thị xã Buôn Hồ tơbăt: đunh kơ âu 6 sơnăm sư đei pơ̆k preh băl đơ̆ng gre. 2 sơnăm athei ƀĭch 1 hơnih. Truh ƀơ̆t năm vih vơ̆t gơh sư oei ưh kơ jăng, rim tơdrong oei sa găh lơ pơ mơ̆ng lơ̆m kon hơkăn đĕch. Tơdrong pơlung, tơgŭm đơ̆ng tơmam truh jơhngơ̆m đon đơ̆ng dôm bơngai lơ̆m chi bộ păng kon pơlei rông ƀôt ‘noh jĭ tơdrong ‘lơ̆ng tôch kơ tih tơgŭm klo kăn sư đei dơ̆ng jơhngơ̆m đon hơdrin vă iung jră hăm jĭ jăn, yak hloh mơmat tat đơ̆ng tơdrong arih sa:

“Ƀơ̆t pơ̆k kơ gre truh dang ei ĭnh kŭm đei khŭl kơdră tơring tôch kơ bơngơ̆t truh, đa năm pơlung jơhngơ̆m vă hơdrin yak hloh jĭ jăn, ĭnh bơngai ưh kơ pran, ưh jang đei đei kiơ hloi lăp gơnang lơ̆m kon hơkăn đĕch.”

Kŭm hlôi đei gre tơ̆m preh băl păng đei iŏk kơsơ̆p hla ar Mut măih, Y Mơi Ktla, chi bộ plei Dlung 1B, phường Thống Nhất, thị xã Buôn Hồ, tơbăt, ŭnh hnam găh hnam dơnuh hin, lăp đei 4 sào teh mir. Iŏk kơsô̆ jên tơgŭm 5 triệu hlak jên, ŭnh hnam sư hlôi tơmơ̆t jên jang vei lăng ‘long pơtăm hăm hơmĕng gô hơmet ‘lơ̆ng đei plei ‘yăl, hơtŏk ‘lơ̆ng iŏk yua ăn ŭnh hnam:

“Bơnê kơ Anih jang Đảng phường tơgŭm asong kơsơ̆p hla ar ‘mơ ‘met jên vă hơtŏk iŏk yua ăn ŭnh hnam. Kơsơ̆p hla ar ‘mơ ‘met jên ‘noh đei jên răt phŏng săy ăn cheh phe păng răt hơdrĕch ‘long pơtăm păng răt pơgang hơmet jĭ ăn kơdih kâu.”

Lei lăi thoi noh mơ̆n, hăm kơsơ̆p hla ar ‘mơ ‘mêt jên đei tơgŭm, H’Môi Buôn Yă, chi bộ plei DLung 1A, phường Thống Nhất hlôi tơgop dơ̆ng vă răt 1 pôm rơmo yŏng brŏk rong:

“Âu ki ĭnh đei iŏk kơsơ̆p hla ar ‘mơ ‘met mut maih, mă khan ưh kơ đei lơ ră mă lei ĭnh ƀôh tôch kơ chhôk, tơgŭm ĭnh hơmet đei 1 păh hơ yơ ‘noh vă tơgŭm mŭk drăm ĭnh ƀơ̆t kơ plăh doh.”

Tơdrong jang “Kơsơ̆p hla ar Mut măih” đei Anih jang Đảng Thị xã Buôn Hồ tơlĕch jang đơ̆ng khei 3 sơnăm 2023. Kiơ̆ kơ ‘noh, rim kang ƀô̆, đảng viên lơ̆m thị xã bơ̆ jang kiơ̆ ‘mơ ‘met jên hăm lơ trong nhen 1 năr jên khei, iŏk jang dôm tơdrong jang pơm kơjă mŭk drăm vă pơjing jên mong. Hơgăt rim sơnăm rim đảng bộ tơring ‘mơ ‘met đei 1 truh 2 “hla ar ‘mơ ‘met Mut măih”; rim chi bộ tơring ‘mơ ‘met đei 1 “Kơsơ̆p hla ar ‘mơ ‘met Mut măih”. Đơ̆ng rŏng 6 khei tơlĕch jang, thị xã hlôi hơvơn đei vă jê̆ 400 triệu hlak jên, pơm 73 kơsơ̆p hla ar ‘mơ ‘met jên, đei kơjă 1 kơsơ̆p hla ar ‘noh 5 triệu hlak jên, pơjao asong ăn kơ dôm đảng viên đei tơdrong arih sa mơmat tat lơ̆m tơring.

Yă Nguyễn Thị Thu Nguyệt, Bí thư anih jang Đảng Thị xã Buôn Hồ tơbăt, tơdrong jang “Kơsơ̆p hla ar ‘mơ ‘met Mut măih” jĭ tơdrong jang ưh kơ đei ‘nao mă lei trong jang đei dôm tơdrong tơplih ‘nao hlôi hơnhăk ăn iŏk yua lơ. ‘Nâu jĭ tơdrong jang ‘lơ̆ng, tơƀôh hơnăp jang hơdăh đơ̆ng rim kang ƀô̆ đảng viên păng rim anih jang Đảng lơ̆m tơdrong hŏk pơhrăm păng jang kiơ̆ ƀok Hồ. Tơdrong pơjing, pơjao asong “Kơsơ̆p hla ar ‘mơ ‘met Mut măih” oei tơgop pơjing khŭl kang ƀô̆ pơm jŭk yŭk trong hơlâu găh jơhngơ̆m đon ‘lơ̆ng, trong arih, tơklep hăm anih jang đảng:

"Gơh tơroi blŭng a jên âu tam mă lơ, mă lei sư kŭm pơm đei ‘lơ̆ng, tơdrong păr ang să tih lơ̆m khŭl jang Đảng lơ̆m thị xã păng mă loi ‘noh jĭ pơm đei tơdrong bơngơ̆t truh tôch kơ tih đơ̆ng kang ƀô̆ đảng viên tơ̆ rim tơring. Tơdrong gĭt kăl tih hloh, 1 tơdrong ‘lơ̆ng chĭnh trĭ đảng tơ̆ âu ‘noh jĭ ‘moi kiơ̆ tơdrong pơjao kơsơ̆p hla ar ‘mơ ‘met Mut măih âu vă tơklep hơnăp jang tơnăp đơ̆ng đảng viên hăm tơdrong vang jang pơgơ̆r jang đơ̆ng khŭl jang đảng tơ̆ tơring, mă loi ‘noh jĭ chi bộ tơ̆ tơring vă hơtŏk ‘lơ̆ng hŏk hôp chi bộ hrei ‘nâu.”

Tơdrong jang “Kơsơ̆p hla ar ‘mơ ‘met Mut măih” tŏk bŏk hơnhăk ăn dôm jơnei ‘lơ̆ng, tơƀôh tơdrong ‘mêm mơnat gĭt kăl, đei đảng viên păng kon pơlei tơ̆ Thị xã Buôn Hồ, Dak Lak, lăng ‘lơ̆ng, pơm tơdrong păr ang lơ̆m tơpôl.