Tơbăt tơ̆ hơnăp Kuô̆k hô̆i, Kơ iĕng Thủ tướng Teh đak Lê Minh Khái tơbăt, dôm khei blŭng sơnăm 2024, mŭk drăm sơđơ̆ng, kơjă tŏk jur păh ai. Tŏk GDP jăl I-2024 iŏk đei 5,66%, lơ hlŏh lơ̆m jăl jang 2020 – 2023.

Jô̆ đĭ sơnăm 2023, hlôi ‘măn ăn dang 680.000 ti hlak jên vă tơlĕch jang kiơ̆ trong hơmet jên khei ‘nao. Găh tơdrong jang păng trong jang tơm, Kơ iĕng Thủ tướng hlôi pơma tơbăt 11 tơdrong jang tơlĕch jang kiơ̆ lơ̆m khei năr kơnh, lơ̆m au tơlĕch jang hơdrol atŏk kơtang tŏk păh ai hăm sơđơ̆ng mŭk drăm; iung jang hơdoi kơjăp, jơnei, ‘lơ̆ng hơ iă rim trong jang chĕp pơgơ̆r mŭk drăm. Atŭm hăm ‘noh, hơnơ̆ng pơm pơkeh khul kơdră chĕp pơgơ̆r teh đak rơgoh ‘lơ̆ng, kơtoei, jơnei; tơplih ‘nao trong chĕp pơgơ̆r vei lăng bơ̆ jang, tơ iung pơjing khul kang ƀô̆, kơdră chĕp pơgơ̆r đei jơhngơ̆m đon ‘lơ̆ng, hơgei, tơnăp, tơpă jing dôm bơngai đei kon pơlei gơnang; tơlĕch jang hơmet ming kon jên khei ‘nao đơ̆ng năr 1/7/2024.