'Măng hop akŏm mă 10, Jơnŭm jang vei lăng kon pơlei dêh char Lâm Đồng jăl 10 sơkơ̆t hơdăh, tơdrong asong hla bar phep ming man dôm tơdrong kăl, mă lơ noh man hnam oei tơ-'ngla păng tơdrong jang vei hơlen đơ̆ng anih jang kơpal găh sơđơ̆ng tơdrong ming man tơ̆ Đà Lạt pơma hơdrô̆, kơ dêh char Lâm Đồng pơma atŭm oei pơhơi pơhŏ, đei lơ tơdrong ưh kơ 'lơ̆ng. Lơ̆m noh, đei 'măng hơlih taluy, tơ̆ anih ming man pơm 2 'nu lôch păng 5 'nu rơka tơ̆ phương 10, pơlei tơm Đà Lạt ăh pơgê năr 29/6 'noh hơdăh hloh.

Pơma akŏm păng tơblang ăh 'măng apinh jet, ƀok Trần Văn Hiệp, Kơdră Anih pơgơ̆r vei lăng kon pơlei dêh char Lâm Đồng akhan, tơdrong pơkă, vei sơđơ̆ng ming man lơ̆m tơring kơdrơ̆m athei pơtoi kơhret kơjăp, athei pơđăp păng tơlĕch tơchơ̆t hơdăh ăn rim tơring, mă kăl noh tơ̆ dôm tơring teh krang, đei pơnơ̆ taluy kơjung.