Tơ̆ hop akŏm, Jơnŭm pơgơ̆r kon pơlei dêh char Đắk Lắk hlôi asong pơdơ̆h jang pơm Kơdră jang lơ̆m Anih vei lăng kon pơlei dêh char Đắk Lắk jăl X, đơ̆ng 2016- 2021 hăm yă H’Yâo Knul, Bí thư đảng apŭng Krông Ana, adrol ki pơm Kơdră Anih vei lăng hơdrĕch kon kông dêh char, yoa iŏk jang tơdrong jang nai dơ̆ng. Jơnŭm pơgơ̆r kon pơlei oei roi tơbăt tơdrong pôk tơmât dơ̆ng bơngai jang lơ̆m Anih vei lăng kon pơlei dêh char Đắk Lắk jăl X, đơ̆ng 2021-2026 hăm ƀok Nguyễn Kính, Kơdră Anih vei lăng hơdrĕch kon kông dêh char.

Lơ̆m hop akŏm kiơ̆ tơdrong jang ‘măng mă 13 âu mơ̆n, Jơnŭm pơgơ̆r kon pơlei dêh char Đắk Lắk pơma nuh, hơlen năng 7 tơdrong tơchơ̆t gĭt kăl, pơyoa ăn tơdrong pơgơ̆r, vei lăng tơdrong jang mŭk drăm, tơpôl kơ dêh char. Lơ̆m noh đei dôm tơdrong tơchơ̆t nhen: hŭt lĕ tơdrong tơchơ̆t đơ̆ng Jơnŭm pơgơ̆r kon pơlei dêh char găh tơlĕch jên dêh char vang pơm Trong Hồ Chí Minh jăl trong ver găh Hơlĕch plt Buôn Ma Thuột, dêh char Đắk Lắk; Tơdrong tơchơ̆t tơgŭm thim jên sŏng xa ăn kăn ƀô̆, linh Khul K51 năm bơ̆ jang sir chă, mong akŏm kơting linh lôch tang tơ̆ teh đak đe; Tơdrong tơchơ̆t găh jên bơ̆ jang tơdrong jang “Pơjing tơpôl hŏk pơhrăm đơ̆ng 2021 - 2030”.