Lơ̆m noh, tơm ‘noh jĭ jang hơdai pơgơ̆r dôm tơdrong jang tơbăt 15 sơnăm kĭ tơchơ̆t kơthơ chĕng teh hơtâp jrăng sơlam tơ̆ teh Việt Nam - Trung Quốc, Tơdrong tơchơ̆t găh trong vei lăng tơring sơlam tơ̆ teh Việt Nam - Trung Quốc; tơdrong bơ̆jang pơlong lăng, tơlĕch trong jang, trong jang yak truh vei lăng tơpă Hơnih chă tơmang lăng chơ kơi đak kơtăh Bản Giốc (Việt Nam) - Đức Thiên (Trung Quốc) lơ̆m sơnăm 2024 păng 1,2 tơdrong ƀơm truh nai.

Tơ̆ hơnăp kơnh, 2 păh drơ̆ng nơ̆r gô hơnơ̆ng jang hơdai kơjăp lơ̆m trong jang Anih jang hơdai tơring sơlam tơ̆ teh Việt Nam - Trung Quốc, jang ‘lơ̆ng tơdrong jang vei lăng tơring sơlam, ‘măng jang sơlam kiơ̆ ƀlep 03 hla ar kăl trŏ luơ̆t găh tơring sơlam tơ̆ teh Việt Nam - Trung Quốc păng dôm hla ar drơ̆ng nơ̆r ƀơm truh, pơtrŭt jang hơdai, hơtŏk tơiung tơ̆ tơring sơlam, vang pơjing trong sơlam đơ̆ng 2 teh đak rơngei, tơbôl, sơđơ̆ng, jang hơdai păng hơtŏk tơiung.