Pơgê năr 13/5, tơ̆ Hnam Kuô̆k hô̆i, kơ yuơ Kơ iĕng kơdră chep pơgơ̆r Kuô̆k hô̆i Trần Thanh Mẫn chĕp kơ̆l, Hơnih bơ̆ jang chĕp pơgơ̆r Kuôk hô̆i pơgơ̆r blŭng a ‘măng hop akŏm mă 33.Pơgơ̆r lơ̆m 3 năr, tơ̆ Hop akŏm 33, Hơnih bơ̆ jang chĕp pơgơ̆rKuôk hô̆i lăng hơlen, ăn tơgop nơ̆r lơ̆m 14 tơdrong kăl hơmet ăn ‘Măng hop akŏm mă 7, Kuô̆k hô̆i jăl XV.

Kơ iĕng Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, Lăp pă 1 giĕng dơ̆ng ‘noh pơgơ̆r hop akŏm mă 7, Kuô̆k hô̆i jăl XV, lơm mă noh, tơdrong jang tôch kơ lơ, kơ yuơ lơ loh, tơ̆ hop akŏm 33, athei rim kơdră jang lơ̆m Hơnih bơ̆ jang Kuô̆k hô̆i ăn tơgop nơ̆r găh hô sơ păng rim tơdrong kơ rim tơdrong vă jang, trong vă pơjing khôi luơ̆t, Tơdrong tơchơ̆t;lơ̆m au pơm hơdăh rim tơdrong vă jang, trong tơlĕch ăn hlôi hơmet pơ’lơ̆ng tôm tong rim trong bơ̆ jang kơ Đảng;  kiơ̆ rok ƀlep trong chĕp pơgơ̆r tơ iung pơjing khôi luơ̆t, tơdrong tơchơ̆t; tơdrong trŏ lăp Khôi luơ̆t tơm, trŏ lăp păng lăp mĭnh đon hăm tơdrong khôi luơ̆t. Kơ iĕng kơdră chĕp pơgơ̆r Kuô̆k hô̆i Trần Thanh Mẫn athei rim hơnih jang tĕnh koăng pơm keh đang rim tơdrong găh hơnăp jang, hrôih pơtruh hla bơar vă Khul kơdră tang măt Kuô̆k hô̆i chă lăng hơlen hơdrol kơ ‘Măng hop akŏm mă 7.